ബോട്ടപകടത്തില് മരിച്ച യുവാവിന്റെ മോഷണം പോയ ബൈക്ക് ഉപേക്ഷിച്ച നിലയില് കണ്ടെത്തി
പരപ്പനങ്ങാടി : താനൂര് തൂവല് തീരം ബോട്ടപകടത്തില് മരിച്ച യുവാവിന്റെ മോഷണം പോയ ബൈക്ക് ഉപേക്ഷിക്കപ്പെട്ട നിലയില് കേടുപാടുകളോടെ കണ്ടെത്തി.
മരിച്ച താനൂർ ഓലപ്പീടികയിലെ കെ.പി.സിദ്ധീഖിന്റെ കെഎല് 55 എന് 7441 ഡ്രീം യുഗ ബൈക്കാണ് പരപ്പനങ്ങാടി സദ്ദാം ബീച്ച് ഭാഗത്ത് നിന്നും ഉപേക്ഷിക്കപ്പെട്ട നിലയില് കേടുപാടുകളോടെ ലഭിച്ചത്.
ബോട്ട് യാത്ര നടത്താനായി സിദ്ധീഖ് മക്കളായ ഫാത്തിമ മിന്ഹ (12), മുഹമ്മദ് ഫൈസാന്(3), ഫാത്തിമ റജ് വ എന്നിവരോടൊത്ത് തീവല് തീരത്തെത്തിയത്.
ഫാത്തിമ റജ് വ ഇപ്പോഴും ചികിത്സയിലാണ്. മറ്റു രണ്ടു പേരും സിദ്ധിഖുമാണ് മരണത്തിന് കീഴടങ്ങിയത്. അപകടം നടന്നതിന്റെ പിറ്റെ ദിവസം ഉച്ചവരെ വാഹനം തൂവല് തീരത്തുണ്ടായിരുന്നു.
എന്നാല് വൈകീട്ട് വാഹനം കാണാതാവുകയായിരുന്നു. മരണാനന്തര ചടങ്ങുകള് കഴിഞ്ഞ് ബൈക്ക് എടുക്കാന് വന്നപ്പോളാണ് വാഹനം കാണാതായത് ശ്രദ്ധയില്പ്പെട്ടത്.
തുടര്ന്ന് സിദ്ധീഖിന്റെ ഭാര്യ പൊലീസില് പരാതിപെടുകയായിരുന്നു. അന്വേഷണം നടന്നു കൊണ്ടിരിക്കുന്നതിനിടയിലാണ് വാഹനം പരപ്പനങ്ങാടി സദ്ദാം ബീച്ച് ഭാഗത്ത് നിന്നും കണ്ടെത്തിയത്.
