മമ്പുറം ആണ്ടുനേര്ച്ചക്ക് 30 ന് തുടക്കം, ഒരുക്കങ്ങൾ പൂർത്തിയായി
തിരൂരങ്ങാടി: മലബാറിലെ ആത്മീയാചാര്യനും നവോത്ഥാന നായകനും സാമൂഹിക പരിഷ്കര്ത്താവുമായിരുന്ന ഖുഥ്ബുസ്സമാന് സയ്യിദ് അലവി മൗലദ്ദവീല തങ്ങളുടെ 184-ാം ആണ്ട് നേര്ച്ചക്ക് അന്തിമ രൂപമായി. ജാതി-മത ഭേദമന്യെ പതിനായിരങ്ങള് പങ്കെടുക്കുന്ന ആണ്ടുനേര്ച്ച് 30 ന് ശനിയാഴ്ച തുടക്കമാകുമെന്ന് ഭാരവാഹികള് വാര്ത്താ സമ്മേളനത്തില് അറിയിച്ചു.
മഖാം ദാറുല്ഹുദാ മാനേജിങ് കമ്മിറ്റി ഏറ്റെടുത്തതിന് ശേഷമുള്ള 24-ാമത്തെ ആണ്ടുനേര്ച്ചയാണ് ഇത്തവണ നടക്കുക.
30 ന് ശനിയാഴ്ച അസ്വര് നമസ്കാരാനന്തരം സയ്യിദ് അഹ്മദ് ജിഫ്രി തങ്ങള് (മമ്പുറം) കൊടി ഉയര്ത്തുന്നതോടെ ഒരാഴ്ച നീണ്ടുനില്ക്കുന്ന 184-ാമത് ആണ്ടുനേര്ച്ചക്ക് തുടക്കമാവും. കൂട്ടസിയാറത്തിന് പാണക്കാട് സയ്യിദ് ഹമീദലി ശിഹാബ് തങ്ങള് നേതൃത്വം നല്കും. രാത്രി മഖാമില് പ്രത്യേക മൗലിദ് പാരായണ സദസ്സും നടക്കും.
31-ന് ഞായറാഴ്ച രാത്രി മജ്ലിസുന്നൂര് ആത്മീയ സദസ്സ് പാണക്കാട് സയ്യിദ് നാസ്വിര് ഹയ്യ് ശിഹാബ് തങ്ങള് ഉദ്ഘാടനം ചെയ്യും. സയ്യിദ് ഫഖ്റുദ്ദീന് ഹസനി കണ്ണന്തളി നേതൃത്വം നല്കും.
ആഗസ്റ്റ് 1,2,3 തിയ്യതികളില് രാത്രി ഏഴരക്ക് മതപ്രഭാഷണങ്ങള് നടക്കും. ഒന്നിന് തിങ്കളാഴ്ച പാണക്കാട് സയ്യിദ് ബശീറലി ശിഹാബ് തങ്ങള് പ്രഭാഷണ പരമ്പര ഉദ്ഘാടനം ചെയ്യും. സ്വാലിഹ് ഹുദവി തൂത പ്രഭാഷണം നടത്തും. രണ്ടിന് പാണക്കാട് സയ്യിദ് റശീദലി ശിഹാബ് തങ്ങള് ഉദ്ഘാടനവും മുസ്ഥഫ ഹുദവി ആക്കോട് പ്രഭാഷണവും നടത്തും. 3 ന് ബുധനാഴ്ച പാണക്കാട് സയ്യിദ് മുനവ്വറലി ശിഹാബ് തങ്ങള് ഉദ്ഘാടനം ചെയ്യും. ഖലീല് ഹുദവി തളങ്കര പ്രഭാഷണം നിര്വഹിക്കും.
4 ന് വ്യാഴാഴ്ച രാത്രി നടക്കുന്ന മമ്പുറം സ്വലാത്ത് മജ്ലിസിന് കോഴിക്കോട് ഖാദി സയ്യിദ് മുഹമ്മദ് കോയ തങ്ങള് ജമലുല്ലൈല് നേതൃത്വം വഹിക്കും.
5 ന് വെള്ളിയാഴ്ച രാത്രി മമ്പുറം തങ്ങള് അനുസ്മരണവും ഹിഫ്ള് സനദ് ദാനവും പ്രാര്ത്ഥനാ സദസ്സും നടക്കും. സമസ്ത ജന.സെക്രട്ടറി കെ. ആലിക്കുട്ടി മുസ്ലിയാര് ഉദ്ഘാടനം ചെയ്യും. സയ്യിദ് അലവി മൗലദ്ദവീല ഹിഫ്ളുല് ഖുര്ആന് കോളേജില് നിന്നു ഖുര്ആന് മനഃപാഠമാക്കിയ ഹാഫിളീങ്ങള്ക്കുള്ള സനനദ് ദാനവും അദ്ദേഹം നിര്വഹിക്കും.
ദാറുല്ഹുദാ വി.സി ഡോ.ബഹാഉദ്ദീന് മുഹമ്മദ് നദ്വി അധ്യക്ഷത വഹിക്കും. അഡ്വ. ഓണമ്പിള്ളി മുഹമ്മദ് ഫൈസി അനുസ്മരണ പ്രഭാഷണം നടത്തും. പ്രാര്ഥനാ സദസ്സിന് പാണക്കാട് സയ്യിദ് അബ്ബാസലി ശിഹാബ് തങ്ങള് നേതൃത്വം നല്കും.
സമാപന ദിവസമായ 6 ന് ശനിയാഴ്ച രാവിലെ എട്ട് മണി മുതല് അന്നദാനം നടക്കും.
പാണക്കാട് സയ്യിദ് സ്വാദിഖലി ശിഹാബ് തങ്ങള് ഉദ്ഘാടനം ചെയ്യും. സയ്യിദ് അബ്ദുര്റഹ്മാന് ജിഫ്രി തങ്ങള് കോഴിക്കോട് അധ്യക്ഷനാവും. സയ്യിദ് ആബിദ് ഹുസൈന് തങ്ങള് എം.എല്.എ തുടങ്ങിയവര് സംബന്ധിക്കും.
ഉച്ചക്ക് 1:30 ന് നടക്കുന്ന മൗലിദ് ഖത്മ് ദുആയോടെ ഒരാഴ്ച്ചത്തെ മമ്പുറം ആണ്ട് നേര്ച്ചക്ക് പരിസമാപ്തിയാവും. സമാപന പ്രാര്ഥനക്ക് സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള് നേതൃത്വം നല്കും. വാര്ത്താ സമ്മേളനത്തില് ഡോ. ബഹാഉദ്ദീന് മുഹമ്മദ് നദ് വി, യു. ശാഫി ഹാജി ചെമ്മാട്, ഡോ. യു വി കെ മുഹമ്മദ്, സി.കെ മുഹമ്മദ് ഹാജി, ഹംസ ഹാജി മൂന്നിയൂര് എന്നിവർ പങ്കെടുത്തു.
