പി.കെ. നവാസിന് രണ്ടാഴ്ചത്തേക്ക് സസ്പെന്ഷന്, വനിതാ കമ്മീഷന് ഹരിത നല്കിയ പരാതി പിന്വലിക്കും
മലപ്പുറം: എം.എസ്.എഫ്-ഹരിത വിവാദം ഒത്തുതീര്പ്പിലേക്കെന്ന് റിപ്പോര്ട്ട്… ബുധനാഴ്ച രാത്രി മലപ്പുറം ലീഗ് ഹൗസില് നടന്ന മാരത്തോണ് ചര്ച്ചയിലാണ് ഇക്കാര്യത്തിലെ ഒത്തുതീര്പ്പ് ഫോര്മുല ഉണ്ടായത്.
വിവാദവുമായി ബന്ധപ്പെട്ട് മൂന്ന് എം.എസ്.എഫ് നേതാക്കളെ സസ്പെന്റ് ചെയ്യും. ഹരിത നേതാക്കള് വനിത കമ്മീഷന് നല്കിയ പരാതിയും പിന്വലിച്ചേക്കുമെന്നാണ് റിപ്പോര്ട്ട്. ഇത് സംബന്ധിച്ച പ്രഖ്യാപനം വ്യാഴാഴ്ച ഉണ്ടാകുമെന്നാണ് പ്രതീക്ഷിക്കുന്നത്. എം.എസ്.എഫ് സംസ്ഥാന പ്രസിഡന്റ് പി.കെ. നവാസിനെ രണ്ട് ആഴ്ചത്തേക്കാണ് സസ്പെന്റ് ചെയ്യുക. കബീര് മുതുപറമ്പ്, വി.എ. അബ്ദുല് വഹാബ് എന്നീ നേതാക്കള്ക്കെതിരെയും നടപടിയുണ്ടാകും.
‘ഹരിത’ നേതാക്കളെ എം.എസ്.എഫ് ഭാരവാഹികള് അധിക്ഷേപിച്ചതുമായി ബന്ധപ്പെട്ട പ്രശ്നങ്ങള് പരിഹരിക്കാന് മുസ്ലിം ലീഗ് ഉന്നത നേതൃത്വം ഇരു വിഭാഗവുമായും കഴിഞ്ഞ ദിവസം കൂടിക്കാഴ്ച നടത്തിയിരുന്നു. മലപ്പുറം ലീഗ് ഹൗസില് നടന്ന ചര്ച്ച ബുധനാഴ്ച രാത്രി 12 മണിക്കാണ് അവസാനിച്ചത്.
ലീഗ് ദേശീയ ജനറല് സെക്രട്ടറി പി.കെ. കുഞ്ഞാലിക്കുട്ടി, ഇ.ടി. മുഹമ്മദ് ബഷീര് എം.പി, എം.കെ. മുനീര് എം.എല്.എ, സംസ്ഥാന ജനറല് സെക്രട്ടറി പി.എം.എ. സലാം, മലപ്പുറം ജില്ല പ്രസിഡന്റ് സാദിഖലി ശിഹാബ് തങ്ങള് എന്നിവരാണ് സംസാരിച്ചത്. ‘ഹരിത’ സംസ്ഥാന ഭാരവാഹികള്ക്കെതിരെ എം.എസ്.എഫ് സംസ്ഥാന പ്രസിഡന്റ് പി.കെ. നവാസ്, മലപ്പുറം ജില്ല ജനറല് സെക്രട്ടറി വി.എ. വഹാബ് എന്നിവര് നടത്തിയ പരാമര്ശം വലിയ വിവാദം സൃഷ്ടിച്ചിരുന്നു.
‘ഹരിത’ ഭാരവാഹികള് വനിത കമീഷനില് പരാതി നല്കിയതോടെയാണ് വിവരം പുറത്തായത്. കഴിഞ്ഞ ആഴ്ച ‘ഹരിത’ സംസ്ഥാന കമ്മിറ്റിയെ മുസ്ലിം ലീഗ് നേതൃത്വം മരവിപ്പിച്ചിരുന്നു. പി.കെ. നവാസ്, എം.എസ്.എഫ് ജില്ല പ്രസിഡന്റ് കബീര് മുതുപറമ്പ്, വി.എ. വഹാബ് എന്നിവരോട് വിശദീകരണവും തേടി.
