NEWS ONE KERALA

ന്യൂസ് വൺ കേരള: news one kerala: Malayalam Online News Portal – Latest Malayalam New : (മലയാളം വാർത്ത)

അരിയിൽ ഷുക്കൂർ വധക്കേസ് വിധി ഇന്ന്; പി ജയരാജനും ടി വി രാജേഷും ഉൾപ്പെടെ 31 പ്രതികൾ

കേരള രാഷ്ട്രീയത്തിൽ ഏറെ ചർച്ചയായ അരിയിൽ ഷുക്കൂർ വധക്കേസിൽ ഇന്ന് വിധി. കൊച്ചിയിലെ സിബിഐ കോടതിയാണ് 31 പ്രതികൾ വിചാരണ നേരിട്ട കേസിൽ വിധി പ്രസ്താവിക്കുന്നത്. സിപിഎം നേതാക്കളായ പി. ജയരാജനും ടി.വി. രാജേഷും ഉൾപ്പെടെയുള്ളവർ പ്രതികളായ കേസിൽ കോടതി തീരുമാനത്തിന് രാഷ്ട്രീയ കേരളം കാത്തിരിക്കുകയാണ്.

 

2012 ഫെബ്രുവരി 12നാണ് കണ്ണൂർ അരിയിൽ സ്വദേശിയും എംഎസ്എഫ് പ്രവർത്തകനുമായ അബ്ദുൽ ഷുക്കൂർ കൊല്ലപ്പെട്ടത്. പി. ജയരാജന്റെയും അന്നത്തെ എംഎൽഎ ടി.വി. രാജേഷിന്റെയും വാഹനവ്യൂഹത്തിന് നേരെ ആക്രമണം നടന്നതിന് പിന്നാലെ മുസ്ലിം ലീഗ് പ്രവർത്തകരെ പിടികൂടി തടഞ്ഞുവെക്കുകയായിരുന്നു. മണിക്കൂറുകളോളം തടങ്കലിൽ പാർപ്പിച്ച ഷുക്കൂറിനെ തിരിച്ചറിയൽ ഉറപ്പാക്കിയ ശേഷമാണ് കൊലപ്പെടുത്തിയതെന്നാണ് സിബിഐ കേസ്. തളിപ്പറമ്പിലെ ചുള്ളിയോട് വയലിൽവെച്ചായിരുന്നു കൊലപാതകം.

 

33 പ്രതികളുണ്ടായിരുന്ന കേസിൽ രണ്ടുപേർ മരിച്ചതോടെയാണ് 31 പേർ വിചാരണ നേരിട്ടത്. ഡിവൈഎഫ്ഐ പ്രവർത്തകരായ കെ.വി. സുമേഷും ഗണേശൻ പി.യുമാണ് ഒന്നും രണ്ടും പ്രതികൾ. സി.എൻ. മോഹനൻ 11-ാം പ്രതിയാണ്. സിപിഎം സംസ്ഥാന സെക്രട്ടറി എം.വി. ഗോവിന്ദന്റെ മകൻ ശ്യാംജിത്തും കേസിൽ പ്രതിയാണ്. പി. ജയരാജൻ 32-ാം പ്രതിയും ടി.വി. രാജേഷ് 33-ാം പ്രതിയുമായിരുന്നു. ഇരുവർക്കുമെതിരെ ഗൂഢാലോചന കുറ്റമാണ് ചുമത്തിയിരിക്കുന്നത്.

 

പി. ജയരാജനെ തളിപ്പറമ്പ് സഹകരണ ആശുപത്രിയിൽ പ്രവേശിപ്പിച്ച സമയത്ത് കൊലപാതക ഗൂഢാലോചന നടന്നെന്നാണ് സിബിഐ കണ്ടെത്തൽ. എന്നാൽ ഗൂഢാലോചന തെളിയിക്കുന്നതിൽ നിർണായകമായ സാക്ഷികൾ കോടതിയിൽ മൊഴി നൽകിയിരുന്നില്ല. കേസിലെ വിധി സിപിഎമ്മിനും സംസ്ഥാന രാഷ്ട്രീയത്തിനും നിർണായകമാകുമെന്നാണ് വിലയിരുത്തൽ.

Leave a Reply

Your email address will not be published. Required fields are marked *

error: Content is protected !!