മലയാളത്തിന് ഏര്പ്പെടുത്തിയ വിലക്ക് ജിബി പന്ത് ആശുപത്രി പിന്വലിച്ചു
ജോലി സമയത്ത് മലയാളം സംസാരിക്കരുതെന്ന് നിര്ദ്ദേശിച്ച് ഡല്ഹിയിലെ ജിബി പന്ത് ആശുപത്രി പുറത്തിറക്കിയ വിവാദ സര്ക്കുലര് പിന്വലിച്ചു. സര്ക്കുലറിനെതിരെ വ്യാപക പ്രതിഷേധം ഉയര്ന്നതിന് പിറകെയാണ് ആശുപത്രിയുടെ നടപടി. സര്ക്കലുര് ഇറക്കിയത് തങ്ങളുടെ അറിവോടയല്ലെന്നും ഉത്തരവ്പുറപ്പെടുവിച്ച സൂപ്രണ്ടിനോട് വിശദീകരണം തേടുമെന്നുമാണ് ഇപ്പോള് ആശുപത്രി അധികൃതര് പറയുന്നത്. സര്ക്കുലറിനെതിരെ കോണ്ഗ്രസിലേയും ബിജെപിയിലേയും പ്രമുഖ നേതാക്കള് ഉള്പ്പെടെയുള്ളവര് രംഗക്ക് വന്നിരുന്നു.
കഴിഞ്ഞ ദിവസമാണ് ജോലി സമയത്ത് ഇംഗ്ലീഷ്, ഹിന്ദി ഭാഷകളില് മാത്രം ആശയ വിനിമയം നടത്തണമെന്നും മലയാളം ഉപയോഗിക്കരുതെന്നും വ്യക്തമാക്കി ജിബി പന്ത് ആശുപത്രി സര്ക്കുലര് പുറത്തിറക്കിയത്. മലയാളം സംസാരിക്കുന്നതിനെതിരെ പരാതി ലഭിച്ചിട്ടുണ്ടെന്നും തീരുമാനം തെറ്റിക്കുന്നവര്ക്കെതിരെ നടപടിയുണ്ടാകുമെന്നുമാണ് സര്ക്കുലറിലുള്ളത്.
