രാഹുല് ഈശ്വര് കസ്റ്റഡിയില്; സൈബര് അധിക്ഷേപ പരാതിയില് നടപടിയുമായി പൊലീസ്
പാലക്കാട് എംഎല്എ രാഹുല് മാങ്കൂട്ടത്തിലിനെതിരെ പരാതി നല്കിയ യുവതിയെ അപമാനിച്ച സംഭവത്തില് രാഹുല് ഈശ്വറിനെ പൊലീസ് കസ്റ്റഡിയിലെടുത്തു. സൈബര് ഇടത്തില് പരാതിക്കാരിയെ അധിക്ഷേപിച്ച സംഭവത്തിലാണ് രാഹുല് ഈശ്വറിനെ സൈബര് പൊലീസ് കസ്റ്റഡിയിലെടുത്തത്. തിരുവനന്തപുരം സിറ്റി സൈബര് പൊലീസെടുത്ത കേസിന് പിന്നാലെ വീട്ടിലെത്തിയാണ് രാഹുല് ഈശ്വറിനെ കസ്റ്റഡിയിലെടുത്തത്.
ഫോണും ലാപ്ടോപ്പും ഹാജരാക്കാനും നിർദേശിച്ചു. എആർ ക്യാംപിലെ വളപ്പിൽ സ്ഥിതി ചെയ്യുന്ന സൈബർ പൊലീസ് സ്റ്റേഷനിലാണ് ചോദ്യം ചെയ്യൽ. സമൂഹമാധ്യമങ്ങളിലൂടെ അപമാനിക്കുന്നതായി യുവതി പരാതി നൽകിയിരുന്നു. സൈബർ കേസിൽ രാഹുൽ ഈശ്വറിന്റെ അറസ്റ്റുണ്ടാകുമെന്നാണ് സൂചന. രാഹുൽ മാങ്കൂട്ടത്തിലിനെ ശക്തമായി പിന്തുണച്ച് രാഹുൽ ഈശ്വർ രംഗത്തുവന്നിരുന്നു.
രാഹുല് മാങ്കൂട്ടത്തിലിനെതിരായ പീഡന കേസില് പരാതിക്കാരിയ്ക്കെതിരായ സൈബര് ആക്രമണത്തില് സൈബര് പൊലീസ് നേരത്തെ കേസെടുത്തിരുന്നു. സാമൂഹിക മാധ്യമങ്ങളിലൂടെയുള്ള യുവതിക്കെതിരായ സൈബര് ആക്രമണത്തിലാണ് സൈബര് പൊലീസ് കേസെടുത്തിരിക്കുന്നത്.
സൈബര് അതിക്രമത്തിലെ പൊലീസ് നടപടിക്ക് പിന്നാലെയാണ് രാഹുല് ഈശ്വറിനെ കസ്റ്റഡിയില് എടുത്തത്. പാലക്കാട്ടെ യൂട്യൂബര്ക്ക് എതിരെയും സൈബര് പൊലീസ് കേസെടുത്തിട്ടുണ്ട്. എ ആര് ക്യാമ്പിലെത്തിച്ച് രാഹുല് ഈശ്വറിനെ ചോദ്യം ചെയ്യുകയാണ്.
സൈബര് ആക്രമണവുമായി ബന്ധപ്പെട്ട് യുവതി നല്കിയ പരാതിയില് ഒരോ ജില്ലകളിലും കേസെടുക്കാനാണ് എഡിജിപി വെങ്കിടേഷ് നിര്ദേശിച്ചിരുന്നത്. സൈബര് ആക്രമണത്തില് അറസ്റ്റുണ്ടാകുമെന്നും കര്ശന നടപടിയുണ്ടാകുമെന്നും എഡിജിപി അറിയിക്കുകയും ചെയ്തിരുന്നു. ഇതിന് പിന്നാലെയാണ് രാഹുല് ഈശ്വറിനെ സൈബര് പൊലീസ് കസ്റ്റഡിയിലെടുത്തത്.
യുവതിയുടെ പരാതിയിൽ രാഹുൽ മാങ്കൂട്ടത്തിലിനെതിരെ പൊലീസ് ജാമ്യമില്ലാ വകുപ്പുകൾ പ്രകാരം കേസെടുത്തിരുന്നു. രാഹുൽ മാങ്കൂട്ടത്തിൽ നിലവിൽ ഒളിവിലാണ്.
