കഞ്ചാവുകേസിൽ 12 വർഷം തടവും ഒരു ലക്ഷം പിഴയും

കൽപ്പകഞ്ചേരി കറുകത്താണി കല്ലൻ വീട്ടിൽ ഇബ്രാഹിമിനെയാണ് (31) ശിക്ഷിച്ചത്. പിഴയടച്ചില്ലെങ്കിൽ ആറു മാസം കൂടി തടവ് അനുഭവിക്കണം.

2021 ജനുവരി 18-നാണ് കേസിനാസ്പദമായ സംഭവം നടന്നത്. പ്രതി ഇബ്രാഹിം താമസിച്ചിരുന്ന തിരൂർ തങ്ങൾസ് റോഡിലുള്ള നാലകത്ത് ക്വാർട്ടേഴ്സ് മുറിക്കകത്തുനിന്നും പരിസരത്ത് നിർത്തിയിട്ടിരുന്ന ഇയാളുടെ കാറിൽനിന്നുമായി 51.5 കിലോഗ്രാം തൂക്കം വരുന്ന കഞ്ചാവ് പിടിച്ചെടുത്തു.

സംസ്ഥാന എക്സൈസ് എൻഫോഴ്സ്മെന്റ് സ്ക്വാഡ് തലവനായ അനിൽകുമാർ നൽകിയ രഹസ്യവിവരത്തിന്റെ അടിസ്ഥാനത്തിൽ തിരൂർ റെയിഞ്ച് എക്സൈസ് ഇൻസ്പെക്ടറായിരുന്ന ഒ. സജിതയും സംഘവുമാണ് കഞ്ചാവ് പിടിച്ചെടുത്തത്. തിരൂർ എക്സൈസ് സർക്കിൾ ഇൻസ്പെക്ടറായിരുന്ന ബി. സുമേഷാണ് കേസന്വേഷണം നടത്തിയത്.

രണ്ട് വർഷമായി പ്രതി റിമാൻഡിൽ കഴിയുകയാണ്. റിമാൻഡിലിരിക്കെത്തന്നെയാണ് പ്രതിക്കെതിരെ കോടതിയിൽ കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ അഡ്വ. അബ്ദുൽ സത്താർ തലാപ്പിൽ ഹാജരായി.