പാരസെറ്റമോൾ മുതൽ ഉറക്കഗുളികകൾ വരെ; യുഎഇയിലേക്ക് മരുന്ന് കൊണ്ടുപോകുമ്പോൾ അറിയേണ്ട കാര്യങ്ങൾ

ദുബൈ: യുഎഇയിലേക്ക് യാത്ര ചെയ്യുന്നവർക്ക് ജാഗ്രതാ നിർദ്ദേശവുമായി അധികൃതർ. യാത്രക്കാർ കൊണ്ടുപോകുന്ന മരുന്നുകളുടെ കാര്യത്തിൽ കർശന നിയന്ത്രണങ്ങളാണ് നിലവിലുള്ളത്. വിദേശ രാജ്യങ്ങളിൽ നിന്ന് യുഎഇയിലേക്ക് യാത്ര ചെയ്യുമ്പോൾ കൈവശം വെക്കാവുന്നതും നിരോധിക്കപ്പെട്ടതുമായ മരുന്നുകളെക്കുറിച്ചുള്ള വ്യക്തമായ വിവരങ്ങൾ അറിയേണ്ടത് അത്യാവശ്യമാണ്.

വളർത്തുമൃഗങ്ങൾക്കായി ഉപയോഗിക്കുന്ന ‘സിപ്രോഫ്ലോക്സാസിൻ’ (Ciprofloxacin) അടങ്ങിയ വെറ്ററിനറി മരുന്നുകൾക്കും അസംസ്കൃത വസ്തുക്കൾക്കും നവംബർ 1 മുതൽ യുഎഇ സമ്പൂർണ്ണ നിരോധനം ഏർപ്പെടുത്തിയിട്ടുണ്ട്. എമിറേറ്റ്സ് ഡ്രഗ് എസ്റ്റാബ്ലിഷ്മെന്റ് (EDE) ആണ് ഇത് സംബന്ധിച്ച ഉത്തരവ് പുറപ്പെടുവിച്ചത്. വ്യക്തിഗത ലഗേജുകളിൽ കൊണ്ടുപോകുന്ന മരുന്നുകളെക്കുറിച്ച് വ്യക്തതയില്ലെങ്കിലും, യാത്രക്കാർ വലിയ ജാഗ്രത പാലിക്കണമെന്ന് വിദഗ്ധർ മുന്നറിയിപ്പ് നൽകുന്നു.

മരുന്നുകളുടെ മൂന്ന് വിഭാഗങ്ങൾ

പൂർണ്ണ നിരോധനം: ഹെറോയിൻ, കൊക്കെയ്ൻ, കഞ്ചാവ്, സൈന്തറ്റിക് കന്നാബിനോയിഡുകൾ, എൽ.എസ്.ഡി, ഫെന്റനൈൽ വകഭേദങ്ങൾ തുടങ്ങിയ ലഹരി വസ്തുക്കളും ശക്തമായ നിരോധിത മരുന്നുകളും ഇതിൽ ഉൾപ്പെടുന്നു.

കുറിപ്പടിയോടുകൂടി അനുവദനീയമായവ: ഒപിയോയിഡ് വേദനസംഹാരികൾ (കൊഡീൻ, മോർഫിൻ), ഉത്കണ്ഠാ വിരുദ്ധ മരുന്നുകൾ (ഡയസെപാം, ആൽപ്രാസോലം), ഉറക്കഗുളികകൾ, അപസ്മാരത്തിനുള്ള മരുന്നുകൾ എന്നിവ ഡോക്ടറുടെ കുറിപ്പടിയോ സാക്ഷ്യപ്പെടുത്തിയ മെഡിക്കൽ റിപ്പോർട്ടോടുകൂടി പരമാവധി 3 മാസത്തെ ഉപയോഗത്തിന് മാത്രം കൈവശം വെക്കാം. ഇതിനായി മുൻകൂട്ടി ആരോഗ്യ മന്ത്രാലയത്തിന്റെ അനുമതി തേടേണ്ടതുണ്ട്.

മുൻകൂർ അനുമതി ആവശ്യമില്ലാത്തവ: പാരസെറ്റമോൾ, ഐബുപ്രൊഫെൻ, ഇൻസുലിൻ, സാധാരണ ആന്റിബയോട്ടിക്കുകൾ തുടങ്ങിയ ഓവർ-ദി-കൌണ്ടർ മരുന്നുകൾ യഥാർത്ഥ പാക്കേജിംഗിലും കുറിപ്പടിയോടുകൂടിയും യാതൊരു അനുമതിയും കൂടാതെ കൊണ്ടുപോകാം.

യാത്രക്കാർ ശ്രദ്ധിക്കേണ്ട പ്രധാന കാര്യങ്ങൾ

മരുന്നുകൾ പരിശോധിക്കേണ്ടത് ബോക്സിലെ ബ്രാൻഡ് നാമത്തിലല്ല, മറിച്ച് അതിന്റെ ജനറിക് നാമത്തിലാണ്.

മരുന്നുകൾ എപ്പോഴും യഥാർത്ഥ പാക്കേജിംഗിലും ഡോക്ടറുടെ കുറിപ്പടിയോടും കൂടി മാത്രം കൈവശം വെക്കുക.

ഏതെങ്കിലും മരുന്നിനെക്കുറിച്ച് സംശയമുണ്ടെങ്കിൽ യാത്രയ്ക്ക് മുൻപ് അടുത്തുള്ള യുഎഇ എംബസിയെയോ കോൺസുലേറ്റെയോ ബന്ധപ്പെടുകയോ എയർലൈൻ അധികൃതരുമായി ബന്ധപ്പെട്ട് വ്യക്തത വരുത്തുകയോ ചെയ്യുക.