കുഴല്പ്പണക്കേസ്: പിടികൂടിയത് 1.12 കോടിയും സ്വര്ണവും; 96 സാക്ഷികളുടെ മൊഴിയെടുത്തു: മുഖ്യമന്ത്രി
തിരുവനന്തപുരം: കൊടകര കുഴല്പ്പണ കേസിന്റെ അന്വേഷണ പുരോഗതി നിയമസഭയില് വ്യക്തമാക്കി മുഖ്യമന്ത്രി. കുഴല്പ്പണ കേസുമായി ബന്ധപ്പെട്ട് പ്രതിപക്ഷം നല്കിയ നോട്ടീസിന് നുമറുപടി പറയുകയായിരുന്നു അദ്ദേഹം. സഭ നിര്ത്തിവെച്ചു വിഷയം ചര്ച്ച ചെയ്യണമെന്ന പ്രതിപക്ഷത്തിന്റെ ആവശ്യം മുഖ്യമന്ത്രി തള്ളി.
കൊടകര കേസില് അന്വേഷണം തുടരുകയാണ്. പ്രത്യേക സംഘമാണു കേസ് അന്വേഷിക്കുന്നത്. തൃശ്ശൂര് റേഞ്ച് ഡി.ഐ.ജിയാണ് അന്വേഷണത്തിന് നേതൃത്വം നല്കുന്നത്. 20 പ്രതികളെ ഇതിനകം അറസ്റ്റ് ചെയ്തുവെന്ന കാര്യം മുഖ്യമന്ത്രി സഭയെ അറിയിച്ചു.
1.12 കോടി രൂപയും സ്വര്ണവും ഇതിനകം പിടികൂടിയിട്ടുണ്ട്. 96 സാക്ഷികളുടെ മൊഴി രേഖപ്പെടുത്തിയതായും മുഖ്യമന്ത്രി സഭയെ അറിയിച്ചു. ഇ.ഡി കേരളാ പൊലീസിനോട് ആവശ്യപ്പെട്ട രേഖകള് ജൂണ് ഒന്നിന് കൈമാറിയെന്നും മുഖ്യമന്ത്രി അറിയിച്ചു.
കേസുമായി ബന്ധപ്പെട്ടുള്ള അന്വേഷണം ഊര്ജ്ജിതമായി നടക്കുകയാണ്. അതുകൊണ്ടുതന്നെ സഭ നിര്ത്തിവെച്ചു വിഷയം ചര്ച്ച ചെയ്യേണ്ട കാര്യമില്ലെന്നും മുഖ്യമന്ത്രി സഭയെ അറിയിച്ചു.അതേസമയം കൊടകര കുഴല്പ്പണ കേസിന്റെ അന്വേഷണം ബി.ജെ.പി അധ്യക്ഷന് കെ. സുരേന്ദ്രന്റെ മകനിലേക്കും നീങ്ങിയിരിക്കുകയാണ്. ധര്മരാജനും സുരേന്ദ്രന്റെ മകനും തമ്മില് ഫോണില് ബന്ധപ്പെട്ടതായാണു പൊലീസ് കണ്ടെത്തിയത്.
