ഇന്ധനവില വീണ്ടും വില വര്ദ്ധിച്ചു; 95 ഉം കടന്ന് മുന്നോട്ട്…
ഇന്ധനവില ഞായറാഴ്ച വീണ്ടും വര്ധിപ്പിച്ചു. പെട്രോളിന് 17 പൈസയും, ഡീസലിന് 29 പൈസയുമാണ് വര്ദ്ധിപ്പിച്ചത്. ഇതോടെ തിരുവനന്തപുരത്ത് പെട്രോളിന് 95 രൂപ 19 പൈസയും,ഡീസലിന് 90 രൂപ 36 പൈസയുമായി.
കൊച്ചിയില് ഒരു ലിറ്റര് പെട്രോളിന് 93 രൂപ 46 പൈസയും, ഡീസലിന് 88 രൂപ 78 പൈസയുമാണ് ഇന്നത്തെ വില. കോഴിക്കോട് പെട്രോള് വില 93.62 രൂപയായും ഡീസല് വില 88.91 രൂപയായും വര്ധിച്ചു.
മാര്ച്ച് നാലിന് ശേഷം 12ാം തവണയാണ് എണ്ണവില കൂട്ടുന്നത്. അതേസമയം അന്താരാഷ്ട്ര വിപണിയില് ക്രൂഡോയിലിന്റെ വില കുറഞ്ഞിരിക്കുകയാണ്. കഴിഞ്ഞ ദിവസം ബാരലിന് 0.79 ഡോളര് ഇടിഞ്ഞ് വില 65.39 ഡോളറിലെത്തി. 1.19 ശതമാനം ഇടിവാണ് വിലയില് ഉണ്ടായത്. തെരഞ്ഞെടുപ്പിന് മുന്നോടിയായി ഇന്ത്യയില് ഇന്ധന വില വര്ധിപ്പിക്കുന്നത് നിര്ത്തിവെച്ചിരുന്നു. എന്നാല് തെരഞ്ഞെടുപ്പ് ഫല പ്രഖ്യാപനത്തിന് പിന്നാലെ വില കുതിച്ചുകയറുകയായിരുന്നു.
വില കൂട്ടുന്നത് എണ്ണക്കമ്പനികളാണ്, സര്ക്കാരല്ല എന്ന വാദമാണ് നിരന്തമായി വിലകൂട്ടുമ്പോള് കേന്ദ്രം കാരണമായി പറഞ്ഞിരുന്നത്. എന്നാല് തെരഞ്ഞെടുപ്പ് കാലത്ത് ക്രൂഡ് ഓയിലിന് വില വര്ധിച്ചപ്പോഴും ഇന്ത്യയില് വില വര്ധിച്ചിരുന്നില്ല.
പെട്രോളിന്റെയും ഡീസലിന്റെയും റീട്ടെയ്ല് വില തത്വത്തില് ആഗോളതലത്തിലെ ക്രൂഡ് ഓയില് വിലയുമായി നേരിട്ടു ബന്ധപ്പെട്ടിരിക്കുന്നതാണ്. അതായത് ക്രൂഡ് ഓയില് വില ഉയരുന്ന സമയത്ത് രാജ്യത്തെ പെട്രോളിന്റെ വില ഉയരുകയും കുറയുന്ന സമയത്ത് കുറയുകയും വേണം.
പക്ഷെ അത്തരത്തിലല്ല ഇന്ത്യയില് കാര്യങ്ങള് സംഭവിക്കുന്നത്. സ്വകാര്യ കമ്പനികള് നിശ്ചയിക്കുന്ന റീട്ടെയ്ല് വിലയോടൊപ്പം കേന്ദ്ര സംസ്ഥാന സര്ക്കാരുകള് ചുമത്തുന്ന നികുതികള് കൂടി ചേര്ന്നതാണ് ഇന്ത്യയിലെ പെട്രോള് ഡീസല് റീട്ടെയ്ല് വില.
