കൊവിഡ് പരിശോധന ഇനി മുതല്‍ വീട്ടിലും; ആന്റിജന്‍ കിറ്റ് ഉടന്‍ വിപണിയിലെത്തും.
കൊവിഡ് ടെസ്റ്റ് ഇനി വീട്ടിലിരുന്നും നടത്താം. വീട്ടില്‍ത്തന്നെ പരിശോധന നടത്താന്‍ കഴിയുന്ന റാപ്പിഡ് ആന്റിജന്‍ ടെസ്റ്റിംഗ് കിറ്റുകള്‍ ഉടന്‍ വിപണിയിലിറക്കുമെന്ന് ഐസിഎംആര്‍ പുറത്തിറക്കിയ വാര്‍ത്താക്കുറിപ്പില്‍ പറയുന്നു. ടെസ്റ്റിംഗ് കിറ്റിന് ഐസിഎംആര്‍ ഔദ്യോഗിക അനുമതി നല്‍കി.
രോഗലക്ഷണങ്ങള്‍ ഉള്ളവര്‍ക്ക് മാത്രമോ, അതല്ലെങ്കില്‍ ലാബില്‍ പരിശോധിച്ച് പോസിറ്റീവായവരുടെ പ്രൈമറി കോണ്ടാക്ടായവര്‍ക്കോ മാത്രമേ ആന്റിജന്‍ പരിശോധന നിര്‍ദേശിക്കുന്നുള്ളൂ എന്ന് വാര്‍ത്താക്കുറിപ്പില്‍ പറയുന്നു.
രാജ്യത്ത് കൊവിഡ് വ്യാപനം രൂക്ഷമായി പടരുന്ന സാഹചര്യത്തില്‍ ടെസ്റ്റിംഗ് പരമാവധി കൂട്ടാനാണ് വീട്ടില്‍ത്തന്നെ ആന്റിജന്‍ പരിശോധന നടത്താനുള്ള കിറ്റ് പുറത്തിറക്കാനൊരുങ്ങുന്നത്. കൊവിഡ് രണ്ടാംതരംഗം ഗ്രാമങ്ങളിലാണ് ഏറ്റവും കൂടുതല്‍ പടരുന്നതെന്ന റിപ്പോര്‍ട്ടുകള്‍ പുറത്തുവരുമ്പോള്‍, കൂടുതല്‍ ടെസ്റ്റിംഗ് കിറ്റുകള്‍ ഗ്രാമീണമേഖലകളിലേക്ക് ഇതുവഴി എത്തിക്കാനാകുമെന്നും, ഐസിഎംആര്‍ കരുതുന്നു. വീടുകളിലെത്തി ആന്റിജന്‍ പരിശോധന നടത്തുന്നത് വഴി, രോഗലക്ഷണങ്ങളുള്ളവരെ പരമാവധി പുറത്തിറക്കാതെ പരിശോധന നടത്താനാകുമെന്നും കണക്കുകൂട്ടലുകളുണ്ട്.
മൈലാബ് ഡിസ്‌കവറി സൊല്യൂഷന്‍സ് എന്ന കമ്പനിയാണ് വീട്ടില്‍ പരിശോധന നടത്താവുന്ന തരം ആന്റിജന്‍ കിറ്റുകള്‍ വികസിപ്പിച്ചത്. എങ്ങനെ പരിശോധന നടത്താമെന്ന വിശദമായ മാന്വല്‍ കിറ്റിന്റെ കവറിലുണ്ടാകും. വീട്ടില്‍ ടെസ്റ്റ് നടത്തുന്ന എല്ലാവരും ഹോം ടെസ്റ്റിംഗ് ആപ്പ് ഡൗണ്‍ലോഡ് ചെയ്യണം. അതിന് ശേഷം, ടെസ്റ്റ് നടത്തിയ ശേഷമുള്ള സ്ട്രിപ്പിന്റെ ചിത്രം ഈ ആപ്പ് വഴി അപ്‌ലോഡ് ചെയ്യണം.
ഏത് ഫോണില്‍ നിന്നാണോ യൂസര്‍ റജിസ്‌ട്രേഷന്‍ നടത്തിയത് അതേ ഫോണില്‍ നിന്ന് വേണം ചിത്രം അപ്‌ലോഡ് ചെയ്യാന്‍. ഈ വിവരങ്ങള്‍ ഒരു സെന്‍ട്രല്‍ സെര്‍വറില്‍ സൂക്ഷിക്കപ്പെടും. ടെസ്റ്റ് കിറ്റ്, സ്വാബ്, മറ്റ് വസ്തുക്കള്‍ എന്നിവ എങ്ങനെ ഉപേക്ഷിക്കാമെന്നതിലും മാന്വല്‍ പ്രകാരമുള്ള നിര്‍ദേശങ്ങള്‍ പാലിക്കണം. ഈ ടെസ്റ്റില്‍ പോസിറ്റീവാകുന്നവരെ ലാബ് പരിശോധനയില്‍ പോസിറ്റീവായവരെപ്പോലെത്തന്നെ കണക്കാക്കുമെന്നും, കൃത്യമായി ക്വാറന്റീനടക്കം പാലിക്കണമെന്നും ഐസിഎംആര്‍ നിര്‍ദേശിക്കുന്നു.
