അമ്മായിയമ്മയെ മരുമകൻ തീയിട്ടു കൊലപ്പെടുത്തി, പൊള്ളലേറ്റ മരുമകനും മരിച്ചു

കോട്ടയം: കുടുംബ വഴക്കിനെ തുടർന്ന് മരുമകൻ ഭാര്യാമാതാവിനെ പെട്രോൾ ഒഴിച്ച് തീ കൊളുത്തി കൊലപ്പെടുത്തി. അന്ത്യാളം പരവൻപറമ്പിൽ സോമന്റെ ഭാര്യ നിർമ്മലയെയാണ് (58) മകളുടെ ഭർത്താവ് കരിങ്കുന്നം സ്വദേശി മനോജ് (42) പെട്രോൾ ഒഴിച്ച് തീ കൊളുത്തി കൊലപ്പെടുത്തിയത്. പൊള്ളലേറ്റ മനോജും മരിച്ചു.

ആറ് വയസുകാരൻ മകനുമായി ഭാര്യയുടെ വീട്ടിലെത്തിയ മനോജ് ഭാര്യയുടെ അമ്മയുടെ ദേഹത്തും സ്വന്തം ശരീരത്തിലും കയ്യിൽ കരുതിയിരുന്ന പെട്രോൾ ഒഴിച്ച് തീ കൊളുത്തുകയായിരുന്നു. സംഭവ സമയത്ത് സോമൻ പുറത്തു പോയതായിരുന്നു.

നിർമ്മലയെ കൂടാതെ വല്യമ്മയും വീട്ടിലുണ്ടായിരുന്നു. ബഹളം കേട്ട് ഓടിക്കൂടിയ നാട്ടുകാരാണ് പാലാ അഗ്നിരക്ഷാ സേനയേയും പൊലീസിനെയും വിവരം അറിയിച്ചത്. അഗ്നിരക്ഷാ സംഘം സ്ഥലത്തെത്തി നാട്ടുകാരുടെ സഹായത്തോടെ ഇരുവരെയും ആദ്യം പാലാ ജനറൽ ആശുപത്രിയിലും തുടർന്ന് കോട്ടയം മെഡിക്കൽ കോളേജ് ആശുപത്രിയിലും എത്തിച്ചു. ഇവിടെവച്ചാണ് ഇരുവരും മരണപ്പെട്ടത്.