ചായക്കടയില്‍ സ്ഫോടനം; അതിഥിത്തൊഴിലാളിക്ക് പരിക്ക്; കടയുടമ കസ്റ്റഡിയിൽ..!
വണ്ടൂർ പോരൂർ രവിമംഗലത്ത് ചായക്കടയിലുണ്ടായ സ്ഫോടനം പരിഭ്രാന്തി പരത്തി. വാളമുണ്ട വെളുത്തേടത്ത് ഉണ്ണികൃഷ്ണന്റെ (50) ചായക്കടയിലാണ് സംഭവം. വലിയ ശബ്ദത്തോടെയായിരുന്നു സ്ഫോടനം. സ്ഫോടനസമയത്ത് അതിഥിത്തൊഴിലാളികൾ ഹോട്ടലിലുണ്ടായിരുന്നു. ഇവരിൽ ഒരാളുടെ ചെവിക്ക് പരിക്കേറ്റിട്ടുണ്ട്. ഉണ്ണികൃഷ്ണന്റെ മുഖത്തും പരിക്കുണ്ട്.
ഇയാളെ പോലീസ് കസ്റ്റഡിയിലെടുത്തിട്ടുണ്ട്. കടയിൽ സൂക്ഷിച്ച പന്നിപ്പടക്കമാണ് പൊട്ടിത്തെറിച്ചതെന്ന് പോലീസ് അന്വേഷണത്തിൽ വ്യക്തമായിട്ടുണ്ട്. സ്ഥലത്ത് പോലീസ് കാവലുണ്ട്.
ഫൊറൻസിക് സംഘം ഇന്ന് സ്ഥലത്ത് എത്തി തെളിവെടുക്കും. പ്രദേശത്ത് പന്നിശല്യം രൂക്ഷമാണ്. ഇയാൾ വീട്ടിലും കടയിലുമായി പന്നിപ്പടക്കമുണ്ടാക്കി വില്പന നടത്താറുള്ളതായി പറയുന്നു. ഇവിടെ മാസങ്ങൾക്കു മുൻപ് നിർമാണത്തിനിടെ പടക്കം പൊട്ടിത്തെറിച്ച് അതിഥിത്തൊഴിലാളിക്ക് പരിക്കേറ്റിരുന്നു. ഈ സംഭവത്തിൽ ഇയാൾക്കെതിരേ പോലീസ് കേസെടുത്തിരുന്നു.
സ്ഫോടനത്തിൽ അലമാരയുടെ ചില്ലുകളും ഉള്ളിലുണ്ടായിരുന്ന ചെറിയ ഇരുമ്പുമേശയുടെ അടിഭാഗവും തകർന്നിട്ടുണ്ട്. സ്ഫോടനശേഷം ഉണ്ണികൃഷ്ണൻ അവിടം അടിച്ചുവാരി കുപ്പിച്ചില്ലുകളും മറ്റും പുറത്തേക്ക് കളയുകയായിരുന്നു.
