താനാളൂരിൽ ബസും ഗുഡ്‌സ് ഓട്ടോയും കൂട്ടിയിടിച്ച്‌ ഏഴുവയസുകാരി മരിച്ചു.
മലപ്പുറം: താനാളൂരിൽ ബസും ഗുഡ്‌സ് ഓട്ടോയും കൂട്ടിയിടിച്ച്‌ ഏഴുവയസുകാരി മരിച്ചു. താനാളൂര്‍ അരീക്കാട് സ്വദേശി വടക്കിനിയേടത്ത് അഷ്റഫിൻ്റെ മകള്‍ സഫ്‍ല ഷെറിൻ ആണ് മരിച്ചത്. ഇന്ന് രാവിലെ എട്ടരയോടെ താനാളൂര്‍ ചുങ്കത്ത് വെച്ചാണ് അപകടം. ഒഴൂര്‍ വെട്ടുകുളത്തെ ബന്ധുവീട്ടില്‍ നിന്നും ബന്ധുവായ സാക്കിറിനൊപ്പം ഓട്ടോയില്‍ അരീക്കോട്ടേയ്ക്ക് പോകുംവഴിയാണ് സംഭവം. മുന്നിലുള്ള വാഹനത്തെ മറികടക്കുന്നതിനിടെ പെട്ടി ഓട്ടോയും ബസും കൂട്ടിയിടിക്കുകയായിരുന്നു.
ഇടിയുടെ ആഘാതത്തില്‍ ഓട്ടോ തലകീഴായി മറിയുകയും മുന്‍ഭാഗം പൂര്‍ണമായും തകരുകയും ചെയ്തു. ഉടൻ തന്നെ നാട്ടുകാരും ദൃക്സാക്ഷികളും രക്ഷാപ്രവർത്തനം നടത്തിയെങ്കിലും വിദ്യാർഥിനി സംഭവസ്ഥലത്തുവെച്ചു തന്നെ മരിക്കുകയായിരുന്നു.
അരീക്കാട് എഎംയുപി സ്കൂൾ രണ്ടാം ക്ലാസ് വിദ്യാർഥിനിയാണ് മരിച്ച സഫ്‍ല ഷെറിൻ. മൃതദേഹം തിരൂര്‍ ജില്ലാ ആശുപത്രി മോര്‍ച്ചറിയിയിലേക്ക് മാറ്റി. തുടർ നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകും. അപകടത്തിൽ പരിക്കേറ്റ ഓട്ടോ ഡ്രൈവര്‍ വെട്ടുകുളം സ്വദേശി കിഴക്കേക്കര സാക്കിറിനെ ഗുരുതര പരിക്കുകളോടെ കോട്ടക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചു. സംഭവത്തിൻ്റെ സിസിടിവി ദൃശ്യങ്ങളും ഇതിനകം പുറത്തുവന്നിട്ടുണ്ട്.
