ക്വാറിയിലെ വെള്ളക്കെട്ടില്‍ വീണ് രണ്ടു കുട്ടികള്‍ മരിച്ചു
മലപ്പുറം : ജില്ലയില്‍ മുങ്ങിമരണങ്ങള്‍ തുടര്‍ക്കഥയാകുന്നു. വള്ളുവമ്പ്രത്ത് ചെങ്കൽ ക്വാറിയിലെ വെള്ളക്കെട്ടില്‍ വീണ് സഹോദരങ്ങളുടെ മക്കൾ മരിച്ചു. മാണിപ്പറമ്പ് സ്വദേശികളായ ചെമ്പേക്കാട് രാജന്റെ മകൾ അർച്ചന(15) , രാജന്റെ സഹോദരൻ വിനോദിന്റെ മകൻ ആദിൽ ദേവ് (4) എന്നിവരാണ് മരിച്ചത്.
വീട്ടിനടുത്ത ചെങ്കൽ ക്വാറിയിൽ ഇന്ന് രാവിലെ 9.30നാണ് അപകടം നടന്നത്.
ആദിൽ ദേവ് അബദ്ധത്തിൽ ക്വാറിയിലെ വെള്ളക്കെട്ടിൽ വീഴുകയായിരുന്നു. ഈ സമയത്ത് കൂടെയുണ്ടായിരുന്ന അർച്ചന രക്ഷിക്കാനായി വെള്ളത്തിലിറങ്ങിയതോടെ രണ്ടു പേരും മുങ്ങിത്താഴ്ന്നു. നാട്ടുകാർ ഓടി എത്തിയപ്പോഴേക്കും രണ്ട് കുട്ടികളും മുങ്ങി മരിക്കുകയായിരുന്നു. മൃതദേഹങ്ങള്‍ മഞ്ചേരി മെഡിക്കല്‍ കോളേജിലേക്ക് മാറ്റി.
