ലിംഗപരമായി ആരെയും അധിക്ഷേപിച്ചിട്ടില്ല; തെറ്റ് ചെയ്തില്ലെന്ന് ഖേദപ്രകടന വുമായി പി.കെ. നവാസ്
കോഴിക്കോട്: ഹരിത നേതാക്കളെ അധിക്ഷേപിച്ചെന്ന പരാതിയില്‍ ലീഗ് നേതൃത്വത്തിന്റെ നിര്‍ദ്ദേശ പ്രകാരം ഖേദ പ്രകടനവുമായി എം.എസ്.എഫ് അധ്യക്ഷന്‍ പി.കെ. നവാസ്.
വ്യക്തിപരമായോ ലിംഗപരമായോ ആരെയും താന്‍ അധിക്ഷേപിച്ചിട്ടില്ലെന്നും സഹപ്രവര്‍ത്തകരില്‍ ആര്‍ക്കെങ്കിലും ഏതെങ്കിലും തരത്തില്‍, തെറ്റിദ്ധരിച്ചോ അല്ലാതെയോ എന്തെങ്കിലും പ്രയാസമുണ്ടായിട്ടുണ്ടെങ്കില്‍ അതില്‍ ഖേദം പ്രകടിപ്പിക്കുന്നെന്നും പി.കെ. നവാസ് സോഷ്യല്‍ മീഡിയയില്‍ പങ്കുവെച്ച ഖേദപ്രകടനത്തില്‍ പറഞ്ഞു.
സ്ത്രീകളോടും, മുതിര്‍ന്നവരോടും, കുട്ടികളോടും ബഹുമാനാദരവുകളോടെ സംസാരിക്കാനാണ് ഇത് വരെ ശീലിച്ചിട്ടുള്ളത്. ഇനിയും അങ്ങിനെ തന്നെയായിരിക്കും. എന്നാല്‍ തന്റെ സംസാരത്തില്‍ സ്ത്രീ വിരുദ്ധതയും വ്യക്തി ആക്ഷേപവും ഉണ്ടായെന്ന പരാതി സഹപ്രവര്‍ത്തകരായ ഹരിത ഭാരവാഹികള്‍ നേതൃത്വത്തിന് നല്‍കിയിരുന്നു. ഈ വിഷയത്തില്‍ നിരവധി തവണ നേതാക്കള്‍ ഉത്തരവാദിത്തപ്പെട്ടവരുമായി സംസാരിച്ചിരുന്നെങ്കിലും പ്രശ്‌നങ്ങള്‍ പരിഹാരത്തിലേക്ക് എത്തിയിരുന്നില്ലെന്നും നവാസ് വിശദീകരിച്ചു.
