സ്കൂളില് നിന്ന് ബാഗ് എടുക്കാതെ കുട്ടികളെ വിളിച്ചുകൊണ്ടുപോയി’; മൂന്ന് മക്കളെയും കൂട്ടി കടലില് ചാടി ആത്മഹത്യ ചെയ്യാന് അമ്മയുടെ ശ്രമം
കേരള പൊലീസ് ഫെയ്സ്ബുക്കിൽ പങ്കുവെച്ച ചിത്രം
കോഴിക്കോട്: കടലില്ച്ചാടി ആത്മഹത്യ ചെയ്യാനൊരുങ്ങിയ കുറ്റിയാടി സ്വദേശിനിയായ അമ്മയെയും മൂന്നുമക്കളെയും ജീവിതത്തിലേയ്ക്ക് തിരികെകൊണ്ടുവന്ന് കേരള പൊലീസ്.
കോഴിക്കോട് കുറ്റിയാടിയിലെയും കൊയിലാണ്ടിയിലെയും പൊലീസ് സ്റ്റേഷനിലെ ഉദ്യോഗസ്ഥരുടെ അവസരോചിതമായ ഇടപെടലാണ് പാറപ്പള്ളിക്കുസമീപത്ത് മക്കളോടൊപ്പം കടലില്ച്ചാടി ജീവനൊടുക്കാനുള്ള അമ്മയുടെ ശ്രമം പരാജയപ്പെടുത്തിയത്.
കഴിഞ്ഞ ദിവസം വൈകുന്നേരമാണ് സംഭവം. സ്കൂളില് കൈക്കുഞ്ഞുമായെത്തിയ അമ്മ മറ്റു രണ്ടു കുഞ്ഞുങ്ങളെയും സ്കൂള് ബാഗ് എടുക്കാതെ വിളിച്ചുകൊണ്ടു പോയതില് അസ്വാഭാവികത തോന്നിയ അധ്യാപകര് ആ വിവരം കുറ്റിയാടി പൊലീസ് സ്റ്റേഷനില് അറിയിക്കുകയായിരുന്നു.
കുറ്റിയാടി പൊലീസ് അമ്മയുടെ ഫോണിന്റെ ലൊക്കേഷന് പരിശോധിച്ചശേഷം കൊയിലാണ്ടി മന്ദമംഗലം പരിസരത്ത് അവര് ഉള്ളതായി മനസ്സിലാക്കി. ഉടന് തന്നെ കൊയിലാണ്ടി പൊലീസിന് വിവരം കൈമാറി.
