വള്ളിക്കുന്ന് അരിയല്ലൂരിൽ ബേക്കറി കുത്തിത്തുറന്ന് മോഷണം: പ്രതി അറസ്റ്റിൽ
പരപ്പനങ്ങാടി : വള്ളിക്കുന്ന് അരിയല്ലൂരിലുള്ള ഫെയ്മസ് ബേക്കറി കുത്തിത്തുറന്ന് മോഷണം നടത്തിയയാൾ അറസ്റ്റിൽ. കടലുണ്ടിനഗരം ബാങ്ക് പടിയിൽ താമസിക്കുന്ന കണ്ണാടത്ത് വീട്ടിൽ ഉമർ മുക്താർ (19) നെയാണ് പരപ്പനങ്ങാടി ഇൻസ്പെക്ടർ കെ.ജെ. ജിനേഷിന്റെ നേതൃത്വത്തിൽ പോലീസ് അറസ്റ്റ് ചെയ്തത്.
ബേക്കറിയുടെ പൂട്ടുപൊളിച്ച് അകത്തു കയറിയ ഇയാൾ സിസിടിവി ക്യാമറകൾ എല്ലാം കാണാൻ പറ്റാത്ത വിധത്തിൽ തിരിച്ചുവെച്ച് പണവും മറ്റു ചോക്ലേറ്റ് ഉത്പന്നങ്ങളും കവർന്നിരുന്നു.
നേരത്തെ തിരൂർ പോലീസ് സ്റ്റേഷൻ പരിധിയിൽ കളവ് കേസിൽ പ്രതിയായ ഉമർ മുക്താറിനെ പിടികൂടി ചോദ്യം ചെയ്തതോടെയാണ് ഇയാൾ കുറ്റം സമ്മതിച്ചതെന്ന് പോലീസ് പറഞ്ഞു.
പരപ്പനങ്ങാടി ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ കോടതി 14 ദിവസത്തേക്ക് റിമാൻഡ് ചെയ്തു. തെളിവെടുപ്പിനായി ഇയാളെ പോലീസ് കസ്റ്റഡിയിൽ വാങ്ങും.
എസ്.ഐമാരായ ആർ.യു. അരുൺ, ജയദേവൻ, സീനിയർ സി.പി.ഒ. അനിൽകുമാർ, സി.പി.ഒ.മാരായ മുജീബ്റഹ്മാൻ, രഞ്ജിത്ത് എന്നിവരും പോലീസ് സംഘത്തിലുണ്ടായിരുന്നു.
