പ്ലസ് ടു സർട്ടിഫിക്കറ്റ് വിതരണം ഇന്നു മുതൽ: വിദ്യാർഥികൾ സ്കൂളുകളിൽ നേരിട്ടെത്തണം
പ്ലസ് ടു പരീക്ഷാ സർട്ടിഫിക്കറ്റ് ഇന്നു മുതൽ വിതരണം ചെയ്യും. ഓരോ ജില്ലയിലെയും കേന്ദ്രീകൃത വിതരണ കേന്ദ്രത്തിൽ നിന്നു പ്രിൻസിപ്പൽമാർ കൈപ്പറ്റി സ്കൂളുകളിലെത്തിച്ച സർട്ടിഫിക്കറ്റുകൾ വിദ്യാർഥികൾക്കു നേരിട്ടെത്തി വാങ്ങാം.
പ്ലസ് ടു ഫലം പ്രഖ്യാപിച്ച് ഒരു മാസം പിന്നിട്ട ശേഷമാണ് സർട്ടിഫിക്കറ്റ് വിതരണം. മെയ്‌ 25നാണ് പ്ലസ് ടു പരീക്ഷാ ഫലം വന്നത്.
ഒറിജിനൽ സർട്ടിഫിക്കറ്റ് ഇല്ലാത്തതിനാൽ വിദേശ സർവകലാശാലകളിലും മറ്റും ഉപരിപഠനത്തിന് അപേക്ഷ നൽകിയവർ പ്രവേശനം നേടാൻ കഴിയാത്ത അവസ്ഥയിലായിരുന്നു.
നടപടികൾ വേഗത്തിലാക്കി ഇന്നു മുതൽ സർട്ടിഫിക്കറ്റ് വിതരണം ആരംഭിക്കും.
