ജയരാജന്‍ തനിക്ക് വേണ്ടി വിമാനത്തില്‍ പ്രതിരോധം തീര്‍ത്തു: മുഖ്യമന്ത്രി
വിമാനത്തില്‍ തനിക്ക് നേരെ വന്നവരെ തടഞ്ഞ് പ്രതിരോധം തീര്‍ക്കുകയായിരുന്നു ഇപി ജയരാജന്‍ എന്ന് മുഖ്യമന്ത്രി. ഇന്‍ഡിഗോ വിമാനത്തില്‍ വച്ചുണ്ടായ സംഘര്‍ഷത്തെ കുറിച്ചുള്ള വിശദാംശങ്ങള്‍ എല്‍ഡിഎഫ് നേതാക്കളുമായി പങ്കുവക്കുകയായിരുന്നു അദ്ദേഹം.
തിരുവനന്തപുരം എകെജി സെന്ററില്‍ ചേര്‍ന്ന യോഗത്തിലാണ് മുഖ്യമന്ത്രി ഇടതു നേതാക്കളോട് വിമാനത്തിലെ സംഭവങ്ങളെക്കുറിച്ച് പറഞ്ഞത്
അതിനിടെ സ്വര്‍ണക്കടത്ത് കേസില്‍ മുഖ്യമന്ത്രിക്ക് നേരെ ഉയര്‍ന്ന ആരോപണങ്ങളെ നേരിടാന്‍ എല്‍ഡിഎഫ് ഇറങ്ങുന്നു. ഇന്ന് തിരുവനന്തപുരത്ത് എകെജി സെന്ററില്‍ ചേര്‍ന്ന എല്‍ഡിഎഫ് യോഗത്തിലാണ് ഇതുമായി ബന്ധപ്പെട്ട തീരുമാനമുണ്ടായത്.
സ്വര്‍ണക്കടത്ത് കേസിലെ പുതിയ നീക്കങ്ങളില്‍ പാര്‍ട്ടിയുടേയും മുന്നണിയുടേയും നിലപാട് ജനങ്ങളോട് വിശദീകരിക്കാനാണ് എല്‍ഡിഎഫ് തീരുമാനം. ഇതിനായി ഈ മാസം 21 മുതല്‍ രാഷ്ട്രീയവിശദീകരണ യോഗങ്ങള്‍ വിളിച്ചു ചേര്‍ക്കും. സംസ്ഥാനത്തെ എല്ലാ ജില്ലകളിലും ഇതിനായി രാഷ്ട്രീയ വിശദീകരണ യോഗങ്ങളും റാലികളും വിളിച്ചു ചേര്‍ക്കും.
മുഖ്യമന്ത്രിക്കെതിരായ പ്രതിഷേധം നടത്തിയ കേസിലെ പ്രതികളെ ഈ മാസം 27 വരെ റിമാന്‍ഡ് ചെയ്തു. പ്രതികളായ മൂന്ന് പേരുടെ ജാമ്യാപേക്ഷയില്‍ നാളെ കോടതി വിധി പറയും. അതേസമയം വിമാനത്തില്‍ വച്ച് എല്‍ഡിഎഫ് കണ്‍വീനര്‍ ഇ.പി.ജയരാജന്‍ കഴുത്തുഞ്ഞെരിച്ചു മര്‍ദ്ദിച്ചുവെന്ന് കോടതിയോട് ഒന്നാം പ്രതി ഫര്‍സിന്‍ മജീദ് പറഞ്ഞു.
