ഹോട്ടലിലെ ശുചിമുറിയില്‍ ഒളിക്യാമറ; ഇതര സംസ്ഥാന തൊഴിലാളി അറസ്റ്റില്‍
ഹോട്ടലില്‍ സ്ത്രീകളുടെ ശുചിമുറിയില്‍ ഒളിക്യാമറ സ്ഥാപിച്ച ഹോട്ടല്‍ ജീവനക്കാരന്‍ അറസ്റ്റില്‍. ബംഗാള്‍ ഉത്തര്‍ ദിനാജ്പുര്‍ ഖൂര്‍ഖ സ്വദേശി തുഫൈല്‍ രാജ(20)യെയാണ് പൊലീസ് അറസ്റ്റ് ചെയ്തത്. പ്രതിയെ ഇന്ന് കോടതിയില്‍ ഹാജരാക്കും.
കഴിഞ്ഞ ദിവസം രാമനാട്ടുകര പാരഡൈസ് ഹോട്ടലില്‍ എത്തിയ യുവതിയാണ് പൊലീസില്‍ പരാതി നല്‍കിയത്. ഭര്‍ത്താവിവോടൊപ്പം എത്തിയ യുവതി ശുചിമുറിയില്‍ കയറിയപ്പോള്‍ ജനലില്‍ വെള്ള പേപ്പര്‍ പൊതിഞ്ഞു വച്ചിരിക്കുന്നത് കണ്ടു. സംശയം തോന്നിയ ഇവര്‍ ഇത് എടുത്ത് നോക്കിയപ്പോഴാണ് പേപ്പറില്‍ പൊതിഞ്ഞ നിലയില്‍ മൊബൈല്‍ ഫോണ്‍ കണ്ടെത്തിയത്. ഫോണ്‍ ക്യാമറ തുറന്നുവെച്ച നിലയിലായിരുന്നു.
ഫോണ്‍ എടുത്ത ശേഷം ഹോട്ടല്‍ ഉടമയെ വിവരം അറിയിച്ചു. പിന്നാലെ പൊലീസില്‍ പരാതിപ്പെടുകയായിരുന്നു. ഫറോക്ക് പൊലീസ് ഇന്‍സ്പെക്ടര്‍ ജി. ബാലചന്ദ്രന്റെ നേതൃത്വത്തില്‍ ഫോണ്‍ പരിശോധിച്ച ശേഷം ഹോട്ടലില്‍ എത്തി പ്രതിയെ അറസ്റ്റ് ചെയ്യുകയായിരുന്നു. ഒന്നര മാസം മുമ്പാണ് ഇയാള്‍ ഹോട്ടലില്‍ ജോലിക്കെത്തിയത്.
