പുതിയ സൈക്കിളുമായി റോഡിലിറങ്ങിയ എട്ടാം ക്ലാസ് വിദ്യാർത്ഥി അപകടത്തെ തുടർന്ന് മരിച്ചു

പുതിയ സൈക്കിൾ നിയന്ത്രണം വിട്ട് മറിഞ്ഞ് എട്ടാം ക്ലാസ് വിദ്യാർത്ഥി മരിച്ചു.ചേവരമ്പലം ഹൗസിങ് ബോർഡ് ഫ്ളാറ്റിൽ താമസിക്കുന്ന വിനോദ് കുമാറിന്റെയും സരിതയുടെയും ഏക മകൾ വൃന്ദ വിനോദാണ് മരിച്ചത്.

പുതിയ സൈക്കിളുമായി ആദ്യമായി റോഡിലിറങ്ങിയതായിരുന്നു വൃന്ദ.സൈക്കിൾ റോഡിലേക്ക് കയറ്റുന്നതിനിടെയുള്ള ചെറിയ ഇറക്കത്തിൽ നിയന്ത്രണം വിട്ടു മതിലിൽ ഇടിച്ചു. സൈക്കിൾ ഹാൻഡിൽ വൃന്ദയുടെ വയറിലും ഇടിച്ചിരുന്നു. ചെറുകുടലിനു പരുക്കേറ്റ വൃന്ദ ആശുപത്രിയിൽ ചികിത്സയിലിരിക്കെ മരിച്ചു.

ഒരാഴ്ച മുൻപാണ് അപകടമുണ്ടായത്. പുറമേ കാര്യമായ പരുക്കുണ്ടായിരുന്നില്ല. ഛർദിയുണ്ടായതിനെ തുടർന്നാണ് ആശുപത്രിയിലെത്തിച്ചത്. വിശദ പരിശോധനയിൽ ചെറുകുടലിനു പരുക്കേറ്റതായി കണ്ടെത്തി. ശസ്ത്രക്രിയ നടത്തി ജീവിതത്തിലേക്കു തിരികെ എത്തുന്നതിനിടെ ഇന്നലെ രാവിലെയായിരുന്നു മരണം.

സെന്റ് ജോസഫ്‌സ് ആംഗ്ലോ ഇന്ത്യൻ ഗേൾസ് സ്‌കൂൾ വിദ്യാർഥിനിയാണ്. സംസ്‌കാരം ഇന്ന് 11നു മാവൂർ റോഡ് ശ്മശാനത്തിൽ.