കൊവിഡില്‍ മരിച്ചവരുടെ ബന്ധുക്കള്‍ക്ക് നാല് ലക്ഷം വീതം നല്‍കാനാവില്ലെന്ന് കേന്ദ്രം
കൊവിഡ് ബാധിച്ച് മരിച്ചവരുടെ ബന്ധുക്കള്‍ക്ക് നഷ്ടപരിഹാരമായി നാല് ലക്ഷം നല്‍കാന്‍ ആവില്ലെന്ന് കേന്ദ്രം. ഇക്കാര്യം അറിയിച്ച് കേന്ദ്രം സുപ്രീം കോടതിയില്‍ സത്യവാങ് മൂലം നല്‍കി. കേസ് കോടതി തിങ്കളാഴ്ച പരിഗണിക്കും. ഓരോ ഇരയ്ക്കും പണം നല്‍കാന്‍ സംസ്ഥാനങ്ങള്‍ക്ക് കഴിയില്ലെന്നും കേന്ദ്രം പറഞ്ഞു. ഇന്നലെ രാത്രിയാണ് 183 പേജുള്ള സത്യവാങ്മൂലം കേന്ദ്രം സമര്‍പ്പിച്ചത്. കൊവിഡ് രോഗം 3.85 ലക്ഷത്തിലധികം മരണങ്ങള്‍ക്ക് കാരണമായിട്ടുണ്ടെന്നും ഇത് വര്‍ദ്ധിക്കാന്‍ സാധ്യതയുണ്ടെന്നും കേന്ദ്രം പറയുന്നു.
കടുത്ത സാമ്പത്തിക പ്രതിസന്ധി നേരിടുന്ന സംസ്ഥാനങ്ങള്‍ക്ക് എല്ലാവര്‍ക്കും പണം നല്‍കാനാവില്ലെന്നും കേന്ദ്രം കൂട്ടിച്ചേര്‍ത്തു. കൊവിഡ് നഷ്ടപരിഹാരം, മരണ സര്‍ട്ടിഫിക്കറ്റ് എന്നിവ സംബന്ധിച്ച നയം അറിയിക്കണമെന്ന് സുപ്രീംകോടതി ആവശ്യപ്പെട്ടതിനെ തുടര്‍ന്നാണ് സര്‍ക്കാരിന്റെ പ്രതികരണം. ഭൂകമ്പം, വെള്ളപ്പൊക്കം തുടങ്ങിയ പ്രകൃതിദുരന്തങ്ങള്‍ക്ക് മാത്രമേ നഷ്ടപരിഹാരം ബാധകമാകൂ എന്ന് ദുരന്തനിവാരണ നിയമം വ്യക്തമാക്കുന്നുവെന്ന് വിശദീകരിച്ച സര്‍ക്കാര്‍, കൊവിഡിനെ പ്രകൃതി ദുരന്തത്തിന് സമാനമായി കണക്കാക്കാനാവില്ലെന്നും പറഞ്ഞു.
അതേസമയം, രാജ്യത്ത് കഴിഞ്ഞ 24 മണിക്കൂറിനിടെ 58,419 പേര്‍ക്കു കൂടി കൊവിഡ് സ്ഥിരീകരിച്ചതായി കേന്ദ്ര ആരോഗ്യ മന്ത്രാലയം അറിയിച്ചു. 81 ദിവസത്തിനു ശേഷമാണ് പ്രതിദിന കേസുകള്‍ അറുപതിനായിരത്തിന് താഴെ എത്തുന്നത്. രാജ്യത്ത് ഇതുവരെ 2,98,81,965 പേര്‍ക്കാണ് കൊവിഡ് സ്ഥിരീകരിച്ചിട്ടുള്ളത്.
