ബൈക്കിടിച്ചു പരിക്കേറ്റ യുവാവിനെ ആശുപത്രിയിലാക്കാൻ കൈകാണിച്ചത് അറുപതോളം വണ്ടികള്‍ക്ക്; ഒടുവില്‍ ദാരുണാന്ത്യം
എറണാകുളം: നിർത്തിയിട്ടിരുന്ന തടിലോറിക്കു പിന്നില്‍ ബൈക്കിടിച്ച്‌ യുവാവ് മരിച്ചു. കോട്ടയം സൗത്ത് പാമ്പാടി ആലുങ്കല്‍പറമ്പില്‍ അനന്തു ചന്ദ്രൻ (30) ആണ് മരിച്ചത്.
എംസി റോഡില്‍ മൂവാറ്റുപുഴ വെള്ളൂർക്കുന്നം സിഗ്നല്‍ സമീപം ചൊവ്വാഴ്ച പുലർച്ചെ ഒരു മണിക്കുശേഷമായിരുന്നു അപകടം.
സ്വകാര്യ ധനകാര്യ സ്ഥാപനത്തില്‍ മാനേജരാണ് ചന്ദ്രൻ. ടയർ പഞ്ചറായതിനെത്തുടർന്ന് ചൊവ്വാഴ്ച രാത്രി ഒരു മണിയോടെ തടിലോറി ഇവിടെ നിർത്തിയിട്ടിരിക്കുകയായിരുന്നു. ബുധനാഴ്ച രാവിലെ 5.15-ഓടെ ലോറിയുടെ ഡ്രൈവറാണ് അപകടം നടന്നത് അറിയുന്നത്. സ്ഥലത്തെത്തിയ പേഴയ്ക്കാപ്പിള്ളി സ്വദേശി ഷൗക്കത്തും മറ്റൊരു വാഹനത്തിലെത്തിയ യുവാക്കളും ചേർന്ന് മൂവാറ്റുപുഴ എംസിഎസ് ആശുപത്രിയിലെത്തിച്ചെങ്കിലും രക്ഷിക്കാനായില്ല.
ലോറിയുടെ പിന്നില്‍ മൂവാറ്റുപുഴ ഭാഗത്തുനിന്നെത്തിയ ബൈക്ക് ഇടിച്ച്‌ കയറുകയായിരുന്നു. തലയ്ക്ക് സാരമായി പരിക്കേറ്റ അനന്തുവിനെ ആശുപത്രിയിലെത്തിക്കാനായി, കാറില്‍ എടുത്തുകയറ്റാൻ സഹായം തേടി ഒട്ടേറെ വണ്ടികള്‍ക്ക് കൈ കാണിക്കേണ്ടി വന്നുവെന്ന് ഷൗക്കത്ത് പറഞ്ഞു. ചിലരൊക്കെ വണ്ടി നിർത്തി കാര്യം തിരക്കിയതല്ലാതെ സഹായിക്കാൻ തയ്യാറായില്ല.
എംസി റോഡിലൂടെ കടന്നുപോയ അറുപതോളം വാഹനങ്ങള്‍ക്കാണ് ലോറി ഡ്രൈവറും ഷൗക്കത്തും ചേർന്ന് ഒരു കൈത്താങ്ങിനായി കൈ കാണിച്ചത്. ഒടുവില്‍ കാറിലെത്തിയ യുവാക്കളടങ്ങുന്ന സംഘമാണ് അനന്തുവിനെ ഷൗക്കത്തിന്റെ കാറില്‍ കയറ്റാൻ സഹായിച്ചത്.
അച്ഛൻ : ചന്ദ്രൻ ചെട്ടിയാർ, അമ്മ: ശോഭ.
സഹോദരി : ആര്യ ചന്ദ്രൻ (യുകെ).
