തിരൂരങ്ങാടിയിൽ എംവിഡിക്ക് വാഹനമില്ല; പതിവ് പരിശോധനകളടക്കം മുടങ്ങുന്നു

തിരൂരങ്ങാടി മോട്ടോർ വാഹന വകുപ്പിന് പരിശോധനകൾ നടത്താൻ തന്നെ സ്വന്തമായൊരു വാഹനമില്ല. ഇത് മൂലം ഡ്രൈവിംഗ് ടെസ്റ്റ് സ്ഥലത്തോ ഫിറ്റ്നസ് പരിശോധന ഗ്രൗണ്ടിലോ എത്താൻ ഉദ്യോഗസ്ഥർ വലിയ പ്രയാസം അനുഭവിക്കുകയാണ്.

15 വർഷം കഴിഞ്ഞ സർക്കാർ വാഹനങ്ങൾ ഒഴിവാക്കുന്നതിന്റെ ഭാഗമായി സബ് ആർ.ടി ഓഫീസിലെ നിലവിലെ വാഹനവും നീക്കം ചെയ്തതാണ് പ്രശ്നത്തിന്റെ പ്രാധാന്യമുള്ള കാര്യം. അപകടത്തിൽപ്പെട്ട വാഹനങ്ങളുടെ പരിശോധനയ്ക്കായി പൊലീസ് സ്റ്റേഷനുകളിലെത്തുന്നതിനും സമയബന്ധിതമായ ഇടപെടലുകൾക്കുമെല്ലാം ഇപ്പോൾ വലിയ തടസ്സങ്ങളാണ് നേരിടുന്നത്.

നിരത്തുകളിൽ കർശന പരിശോധനകൾ നടത്തേണ്ട അവശ്യ ഘട്ടത്തിൽ വാഹനമില്ലാത്ത അവസ്ഥ കൂടുതൽ ബുദ്ധിമുട്ടുണ്ടാക്കുന്നുവെന്ന് ഉദ്യോഗസ്ഥർ പറയുന്നു. അതിനാൽ ഉടൻ പുതിയ വാഹനം അനുവദിക്കണമെന്ന് ആവശ്യപ്പെട്ട് സി.പി.എം തിരൂരങ്ങാടി ലോക്കൽ കമ്മിറ്റി സെക്രട്ടറി എം.പി. ഇസ്മായിൽ മുഖ്യമന്ത്രിക്കും ഗതാഗത വകുപ്പ് മന്ത്രിക്കും നിവേദനം നൽകി.