അധ്യാപകൻ വിദ്യാർത്ഥിനിയെ പീഡിപ്പിച്ചത് മറച്ചുവെച്ചു; സ്വകാര്യ സ്കൂളിനെതിരെ പോക്സോ കേസ്
പ്രതീകാത്മക ചിത്രം
ഏഴാം ക്ലാസ് വിദ്യാർത്ഥിനിയെ അധ്യാപകൻ പീഡിപ്പിച്ച വിവരം മറച്ചുവെച്ച സ്കൂൾ അധികൃതർക്കെതിരെ പോക്സോ കേസെടുത്ത് പൊലീസ്. തിരുവനന്തപുരം നഗരത്തിലെ പ്രമുഖ സ്വകാര്യ സ്കൂളിനെതിരെയാണ് ഫോർട്ട് പൊലീസ് കേസെടുത്തത്. നേട്ടയം സ്വദേശിയായ അധ്യാപകനായ അരുൺ മോഹനാണ് കുട്ടിയെ ഉപദ്രവിച്ചത്.
അധ്യാപകനെതിരെ തിങ്കളാഴ്ച കുട്ടി സ്കൂൾ അധികൃതർക്ക് പരാതി നൽകിയിരുന്നു. അധ്യാപകനെ സസ്പെൻഡ് ചെയ്തുവെങ്കിലും ഈ വിവരം പൊലീസിനെ അറിയിച്ചില്ല. കുട്ടിയുടെ ബന്ധുവാണ് വെള്ളിയാഴ്ച പൊലീസിനെ വിവരം അറിയിക്കുന്നത്. പൊലീസ് കുട്ടിയുടെ മൊഴിയെടുത്തപ്പോഴാണ് സ്കൂൾ അധികൃതരുടെ വീഴ്ചയും പുറത്തുവരുന്നത്.
അഞ്ചാം ക്ലാസ് മുതൽ അധ്യാപകനായ അരുൺ മോഹൻ കുട്ടിയെ ലൈംഗിക ചൂഷണം ചെയ്യുന്നതായി പരാതിയിൽ പറയുന്നു. പ്രഥമ അധ്യാപകനുൾപ്പെടെ സ്കൂൾ അധികൃതർക്കെതിരെയാണ് ഫോർട്ട് പൊലീസ് കേസെടുത്തത്. അറസ്റ്റിലായ അധ്യാപകൻ ഇപ്പോൾ റിമാൻഡിലാണ്.
