പരപ്പനങ്ങാടിയിൽ കഞ്ചാവ് വേട്ട; റെയിൽവേ സ്റ്റേഷനിൽ നിന്ന് മൂന്ന് കിലോ കഞ്ചാവുമായി യുവാവ് പിടിയിൽ
പരപ്പനങ്ങാടി: തിരൂരങ്ങാടി എക്‌സൈസ് സർക്കിൾ പാർട്ടിയും ആർ.പി.എഫും സംയുക്തമായി നടത്തിയ പരിശോധനയിൽ മൂന്ന് കിലോഗ്രാം ( 3.180) കഞ്ചാവുമായി യുവാവ് പിടിയിൽ. കണ്ണൂർ ഇരിട്ടി സ്വദേശി സാംതി മോത്തിയോസ് (20) നെയാണ് പരപ്പനങ്ങാടി റെയിൽവേ സ്റ്റേഷനിൽ വെച്ച് അറസ്റ്റ് ചെയ്തത്.
പരപ്പനങ്ങാടി, ചെമ്മാട്, ചെട്ടിപ്പടി ഭാഗങ്ങളിൽ ചില്ലറ വിൽപ്പനക്കാർക്ക് കഞ്ചാവ് എത്തിച്ചുനൽകുന്ന പ്രധാന കണ്ണിയാണ് ഇയാളെന്നും കേസുമായി ബന്ധപ്പെട്ട് കൂടുതൽ അന്വേഷണങ്ങൾ നടക്കുന്നതായും എക്‌സൈസ് സർക്കിൾ ഇൻസ്‌പെക്ടർ മധുസൂദനൻ പിള്ള പറഞ്ഞു.
ആർ.പി.എഫ്. സബ് ഇൻസ്‌പെക്ടർ പി.ടി. ബാലസുബ്രഹ്‌മണ്യം, അസി.സബ് ഇൻസ്‌പെക്ടർ ബി.എസ്. പ്രമോദ്, അസി. എക്‌സൈസ് ഇൻസ്‌പെക്ടർമാരായ കെ. അഭിലാഷ്, പി.പ്രഗേഷ്, ടി.പ്രജോഷ്, പ്രിവന്റീവ് ഓഫീസർമാരായ ദിലീപ്, രജീഷ് എന്നിവരടങ്ങിയ സംഘമാണ് ഇയാളെ പിടികൂടിയത്.
