പഴയ ചിഹ്നവും ഫോട്ടോയും ഉപയോഗിച്ച് നിയാസ് പുളിക്കലകത്തി നെതിരെ കുപ്രചരണം നടത്തിയ പരപ്പനങ്ങാടി സ്വദേശിക്കെതിരെ പോലീസ് കേസെടുത്തു
തിരൂരങ്ങാടി: തിരൂരങ്ങാടി നിയോജക മണ്ഡലം എൽ.ഡി.എഫ് സ്വതന്ത്ര സ്ഥാനാർത്ഥി നിയാസ് പുളിക്കലകത്തിന്റെ തെരഞ്ഞെടുപ്പ് അടയാളമായ ഫുട്ബോളിന് പകരം ഓട്ടോറിക്ഷയും നിയാസ് പുളിക്കലകത്തിൻ്റെ ഫോട്ടോയും ഉപയോഗിച്ച് വ്യാജ പ്രചരണം നടത്തിയയാൾക്കെതിരെ പോലീസ് കേസെടുത്തു.
പരപ്പനങ്ങാടി ഒട്ടുമ്മൽ സ്വദേശിയും മുസ്ലീം ലീഗ് പ്രവര്‍ത്തകനുമായ ഉബൈദ് എന്നയാളുടെ പേരിലാണ് പരപ്പനങ്ങാടി പോലീസ് കേസെടുത്തത്.
“പരപ്പനങ്ങാടിക്കാര്‍” എന്ന വാട്സ് ആപ്പ് ഗ്രൂപ്പിലൂടെയാണ് വ്യാജപ്രചരണം നടത്തിയത്. എൽ.ഡി.എഫ് പ്രവര്‍ത്തകര്‍ ക്കിടയില്‍ പ്രകോപനം സൃഷ്ടിച്ച് രാഷ്ട്രീയ സംഘര്‍ഷം ഉണ്ടാക്കുന്നതിനും വോട്ടര്‍മാരെ തെറ്റിധരിപ്പിക്കുന്നതിനും വേണ്ടിയാണ് വ്യാജ പ്രചരണം നടത്തിയത്.
സോഷ്യല്‍ മീഡിയയിലൂടെ മുസ്ലീംലീഗ് പ്രവര്‍ത്തകര്‍
വ്യാപകമായി ഈ രീതിയില്‍ പ്രചരണം നടത്തുന്നുണ്ട്. ഇതിനെതിരായി നിയാസ് പുളിക്കലകത്ത് ജില്ലാ പോലീസ് മേധാവിക്ക് നല്‍കിയ പരാതിയിലാണ് പോലീസ് കേസെടുത്തത്.
ഇത്തവണ തെരഞ്ഞെടുപ്പ് കമ്മീഷൻ അനുവദിച്ച “ഫുട്ബോൾ’ ചിഹ്നമാണ്. എന്നാൽ 2016 ലെ നിയമസഭാ തെരഞ്ഞെടുപ്പിൽ തെരഞ്ഞെടുപ്പ് കമ്മീഷൻ അനുവദിച്ച ”ഓട്ടോറിക്ഷ” ചിഹ്നവും അന്നത്തെ ഫോട്ടോയും ഉപയോഗിച്ചാണ് വ്യാപകമായി പ്രചരിപ്പിച്ചിരുന്നത്.
സൈബർ സെല്ലിന്റെ സഹായത്തോടെയാണ് പോലീസ് ഉറവിടം കണ്ടെത്തി കേസെടുത്തത്. ഇത്തരത്തിലുള്ള നിരവധി സൈബർ കേസുകളിൽ പ്രതിയാണ് ഉബൈദ്.
