ഗോൾവേട്ടയിൽ പുതിയ റെക്കോർഡുമായി ക്രിസ്റ്റ്യാനോ റൊണാൾഡോ

റിയാദ്: ഫുട്ബോൾ ​ഗോൾവേട്ടക്കാരുടെ പട്ടികയിൽ പുതിയ റെക്കോർഡ് കുറിച്ച് സൂപ്പർ താരം ക്രസ്റ്റ്യാനോ റൊണാൾഡോ. അറബ് ക്ലബ് ചാമ്പ്യൻസ് കപ്പിൽ അൽ നസറിൻ്റെ ആദ്യ ജയത്തിനൊപ്പമായിരുന്നു റൊണാൾഡോയുടെ നേട്ടം. യുഎസ് മൊണാസ്റ്റിറിനെ ഒന്നിനെതിരെ നാല് ​ഗോളുകൾക്കാണ് അൽ നസർ തോൽപ്പിച്ചത്. മത്സരത്തിൻ്റെ 74-ാം മിനിറ്റിൽ തകർപ്പൻ ഹെഡറർ വലയിലെത്തിച്ചായിരുന്നു റൊണാൾഡോ റെക്കോർഡ് ബുക്കിൽ ഇടം പിടിച്ചത്.

ഏറ്റവും കൂടുതൽ തവണ ഹെഡറർ ​ഗോൾ നേടുന്ന താരമെന്ന റെക്കോർഡ് ക്രിസ്റ്റ്യാനോ സ്വന്തം പേരിലാക്കി. 145-ാം തവണയാണ് ക്രിസ്റ്റ്യാനോ ഹെഡററിലൂടെ ​ഗോൾവല ചലിപ്പിച്ചത്. ജർമ്മൻ ഇതിഹാസ താരം ഗെർഡ് മുള്ളറിൻ്റെ 144 ഹെഡററെന്ന റെക്കോർഡ് ക്രിസ്റ്റ്യാനോ മറികടന്നു. കരിയറിലാകെ 839 ​ഗോളുകളാണ് പോർച്ചു​ഗീസ് താരത്തിൻ്റെ പേരിൽ കുറിച്ചിരിക്കുന്നത്. അൽ നസറിനായി സീസണിലെ ആദ്യ ​ഗോളുമായിരുന്നു ക്രിസ്റ്റ്യാനോ സ്വന്തമാക്കിയത്.

മത്സരത്തിൽ ആധികാരികമായാണ് അൽ നസർ വിജയം നേടിയത്. 74 ശതമാനം സമയത്തും അൽ നസർ പന്ത് കൈവശം വെച്ചു. എങ്കിലും ആദ്യ ​ഗോൾ നേടാൻ 42-ാം മിനിറ്റ് വരെ കാത്തിരിക്കേണ്ടിവന്നു. 66-ാം മിനിറ്റിൽ മൊണാസ്റ്റിറിന സമനില ​ഗോൾ നേടി. എട്ട് മിനിറ്റിന് ശേഷം ക്രിസ്റ്റ്യാനോ റൊണാൾഡോയുടെ ചരിത്ര ​ഗോൾ. 88, 90 മിനിറ്റിൽ വീണ്ടും അൽ നസർ ​ഗോൾ നേട്ടം. വ്യാഴാഴ്ച സമലേക്കുമായാണ് അൽ നസറിൻ്റെ അടുത്ത മത്സരം.