മുഖ്യമന്ത്രിയെ കരിങ്കൊടി കാണിച്ച കേസ്; യൂത്ത് കോണ്‍ഗ്രസ് നേതാക്കള്‍ക്ക് തടവുശിക്ഷ
മലപ്പുറം : മുഖ്യമന്ത്രിയെ കരിങ്കൊടി കാണിച്ച കേസില്‍ യൂത്ത് കോണ്‍ഗ്രസ് നേതാക്കള്‍ക്ക് തടവുശിക്ഷ. കരിപ്പൂര്‍ പോലീസ് രജിസ്റ്റർ ചെയ്ത കേസിലാണ് മഞ്ചേരി ചീഫ് ജുഡീഷ്യല്‍ മജിസ്‌ട്രേറ്റ് കോടതി ഇന്ന് വിധി പറഞ്ഞത്. ഒരുമാസം തടവും 5,200 രൂപ പിഴയുമാണ് കോടതി ശിക്ഷ വിധിച്ചത്.
സ്വാശ്രയ കോളേജ് ഫീസ് വര്‍ധനയുമായി ബന്ധപ്പെട്ട് 2016 ല്‍ മുഖ്യമന്ത്രി പിണറായി വിജയനെ കരിപ്പൂര്‍ വിമാനത്താവളത്തിനു പുറത്ത് കരിങ്കൊടി കാണിക്കുകയും വാഹനം തടഞ്ഞു നിര്‍ത്തുകയും ചെയ്തതിനാണ് യൂത്ത് കോണ്‍ഗ്രസ് നേതാക്കള്‍ക്കെതിരെ കേസെടുത്തത്.
യൂത്ത് കോണ്‍ഗ്രസ് സംസ്ഥാന വൈസ് പ്രസിഡൻ്റ് റിയാസ് മുക്കോളി, സംസ്ഥാന സെക്രട്ടറി പി നിധീഷ്, സംസ്ഥാന നിര്‍വാഹക സമിതി അംഗം ലത്തീഫ് കൂട്ടാലുങ്ങല്‍, വാഴക്കാട് മണ്ഡലം കോണ്‍ഗ്രസ് പ്രസിഡൻ്റ് ജൈസല്‍ എളമരം, അലിമോന്‍ തടത്തില്‍, ജലീല്‍ ആലുങ്ങല്‍, അഷ്‌റഫ് പറക്കുത്ത്, പി പി റഹ്മത്തുള്ള എന്നിവരായിരുന്നു പ്രതിസ്ഥാനത്തുണ്ടായിരുന്നത്.
കേസില്‍ റിയാസ് മുക്കോളിയും നിധീഷും ജൈസലും 14 ദിവസം മഞ്ചേരി സബ് ജയിലില്‍ റിമാന്‍ഡില്‍ കഴിഞ്ഞിട്ടുണ്ട്. സിജെഎം കോടതി വിധിക്കെതിരെ ജില്ലാ കോടതിയില്‍ അപ്പീല്‍ പോവുമെന്ന് സംസ്ഥാന വൈസ് പ്രസിഡന്റ് റിയാസ് മുക്കോളി അറിയിച്ചു. പ്രതികള്‍ക്ക് വേണ്ടി അഡ്വ. കെ എ ജബ്ബാര്‍ ഹാജരായി
