ക്യൂ നില്‍ക്കാതെ മദ്യം ആവശ്യപ്പെട്ടു, ബിവറേജസില്‍ വടിവാള്‍ വീശിയ ഗുണ്ട പിടിയില്‍
തൃശൂരില്‍ ബിവറേജസ് ഔട്ട്ലെറ്റില്‍ ക്യൂ നില്‍ക്കാതെ വടിവാള്‍ എടുത്ത് വീശി ഭീകരാന്തരീക്ഷം സൃഷ്ടിച്ച യുവാവ് പിടിയില്‍. അരിമ്പൂര്‍ സ്വദേശി പണിക്കെട്ടി വീട്ടില്‍ രാകേഷിനെയാണ് പൊലീസ് അറസ്റ്റ് ചെയ്തത്. തൃശൂര്‍ അന്തിക്കാട് ബിവറേജസ് ഔട്ട്‌ലെറ്റിന് മുന്നിലായിരുന്നു സംഭവം. നിരവധി പേര്‍ നില്‍ക്കെയാണ് ക്യൂ തെറ്റിച്ച് രണ്ട് പേര്‍ മദ്യം വാങ്ങാന്‍ എത്തിയത്. ക്യൂ നില്‍ക്കാന്‍ ആവശ്യപ്പെട്ടതോടെ ഇയാള്‍ വടിവാള്‍ എടുത്ത് വീശുകയായിരുന്നു.
ഞായറാഴ്ച രാത്രി ഏഴരയോടെയായിരുന്നു സംഭവം. ക്യൂ തെറ്റിച്ച് ബിവറേജസ് കൗണ്ടറിനു മുന്നിലെത്തിയ ആളോട് ജീവനക്കാര്‍ ക്യൂ നില്‍ക്കാന്‍ ആവശ്യപ്പെടുകയായിരുന്നു. എന്നാല്‍ ഇയാള്‍ മദ്യം ആവശ്യപ്പെട്ട് കയര്‍ക്കുകയും, സ്ഥാപനത്തിലെ ബില്ലിംഗ് മെഷീന്‍ തല്ലി തകര്‍ക്കുയും ചെയ്തു. ജീവനക്കാരെ മര്‍ദ്ദിക്കാന്‍ ശ്രമിച്ച ഇയാള്‍ വസ്ത്രത്തിനുള്ളില്‍ ഒളിപ്പിച്ചിരുന്ന വടിവാള്‍ എടുത്ത് വീശി ഭീകരാന്തരീക്ഷം സൃഷ്ടിക്കുകയായിരുന്നു.
പ്രതിയെ സംഭവശേഷം അന്തിക്കാട് നിന്നുമാണ് പൊലീസ് പിടികൂടിയത്. ജില്ലയിലെ 3 കൊലപാതക കേസുകളില്‍ അടക്കം നിരവധി കേസുകളില്‍ പ്രതിയാണ് രാകേഷ്. ഈ അടുത്താണ് ഇയാള്‍ ജയില്‍ശിക്ഷ കഴിഞ്ഞ് ഇറങ്ങിയത്. ഇയാള്‍ക്കെതിരെ പൊതുമുതല്‍ നശിപ്പിച്ചതടക്കം ഉള്ള വകുപ്പുകള്‍ ചുമത്തിയാണ് പൊലീസ് കേസ് എടുത്തിരിക്കുന്നത്. പ്രതിയെ കോടതിയില്‍ ഹാജരാക്കി.
