സ്വന്തം സ്റ്റേഷനിലെ ലാപ്‌ടോപ്പ് കാണാനില്ല; മോഷണക്കുറ്റം ചുമത്തി കേസെടുത്ത് പന്തീരാങ്കാവ് പൊലീസ്
കോഴിക്കോട്: സ്വന്തം സ്റ്റേഷനിലെ ലാപ്‌ടോപ്പ് കാണാത്തതിന് കേസെടുത്ത് അന്വേഷണം ആരംഭിച്ച് കോഴിക്കോട് പന്തീരാങ്കാവ് പൊലീസ്.
സിറ്റി പൊലീസ് കമ്മീഷണറുടെ നിര്‍ദേശ പ്രകാരമാണ് കേസെടുത്തത്. മോഷണക്കുറ്റം ചുമത്തിയാണ് കേസെടുത്തിരിക്കുന്നത്. എന്നാല്‍ എഫ്.ഐ.ആറില്‍ ആരുടേയും പേര് പറഞ്ഞിട്ടില്ല. അലന്‍- താഹ കേസിലേതടക്കം പ്രധാന വിവരങ്ങള്‍ അടങ്ങുന്ന ലാപ്‌ടോപ്പാണ് കാണാതായതെന്നാണ് വിവരം. കുറ്റകൃത്യം തടയാനായി പൊലീസ് സ്റ്റേഷനുകളെ തമ്മില്‍ ബന്ധിപ്പിക്കുന്ന ക്രൈം ആന്‍ഡ് ക്രിമിനല്‍ ട്രാക്ക് സംവിധാനമുള്ള ലാപ്‌ടോപ്പാണ് കാണാതായത്.
സി.ഐക്കാണ് അന്വേഷണ ചുമതല. ഉടന്‍ റിപ്പോര്‍ട്ട് നല്‍കണമെന്നാണ് നിര്‍ദേശം. സ്റ്റേഷനിലെ സാധനങ്ങള്‍ മാറ്റിയപ്പോള്‍ കാണാതായതാകാം എന്ന നിഗമനത്തിലാണ് പൊലീസുകാര്‍.
