കോടിയേരി ബാലകൃഷ്ണൻ ഇനി ദേശാഭിമാനിയുടെ ചീഫ് എഡിറ്റർ
സിപിഐ (എം) മുഖപത്രമായ ദേശാഭിമാനിയുടെ ചീഫ് എഡിറ്ററായി പൊളിറ്റ് ബ്യൂറോ അംഗം കോടിയേരി ബാലകൃഷ്ണൻ ചുമതലയേൽക്കും. നിലവിൽ പത്രത്തിന്റെ ചീഫ് എഡിറ്ററായ സി.പി.എം സംസ്ഥാന സെക്രട്ടേറിയേറ്റ് അംഗം പി രാജീവ് മന്ത്രിയാകുന്ന സാഹചര്യത്തിലാണ് ഈ മാറ്റം. നേരത്തെ പാർട്ടി സംസ്ഥാന സെക്രട്ടറിയായിരുന്ന കോടിയേരി ആരോഗ്യപരമായ കാരണങ്ങൾ ചൂണ്ടിക്കാട്ടി സ്ഥാനത്ത് നിന്ന് അവധിയിൽ പോയിരുന്നു.
കളമശേരി മണ്ഡലത്തിൽ നിന്നും തിരഞ്ഞെടുക്കപ്പെട്ട പി രാജീവ് രണ്ടാം പിണറായി സർക്കാരിൽ വ്യവസായി വകുപ്പ് മന്ത്രിയായി ചുമതലയേൽക്കുമെന്നാണ് റിപ്പോർട്ട്. കോടിയേരിയുടെ മകൻ ബിനീഷ് കോടിയേരി മയക്കുമരുന്ന് കള്ളപ്പണം വെളുപ്പിക്കൽ കേസുകളിൽ ജയിലിലായ പശ്ചാത്തലത്തിൽ കൂടിയായിരുന്നു കോടിയേരി ബാലകൃഷ്ണന് പാർട്ടി സെക്രട്ടറി സ്ഥാനത്ത് നിന്ന് ഒഴിയേണ്ടി വന്നത്.
