ഹയര്‍ സെക്കൻഡറി അധ്യാപകരുടെ സ്ഥലംമാറ്റത്തിന് അപേക്ഷിക്കാം; ഏറ്റവും കൂടുതൽ ഒഴിവുകൾ മലപ്പുറത്ത്..!

സംസ്ഥാനത്തെ സര്‍ക്കാര്‍ ഹയര്‍ സെക്കൻഡറി സ്കൂളുകളിലെ അധ്യാപകരുടെ സ്ഥലംമാറ്റത്തിനായുള്ള ഓണ്‍ലൈന്‍ അപേക്ഷകൾ സമർപ്പിക്കാനുള്ള സമയം അടുത്തെത്തി. www.dhsetransfer.kerala.gov.in എന്ന പോര്‍ട്ടല്‍ വഴി മേയ് മൂന്ന് വരെ അധ്യാപകർക്ക് അപേക്ഷിക്കാം.

വിദ്യാഭ്യാസ വകുപ്പ് സുതാര്യമായ സ്ഥലംമാറ്റ പ്രക്രിയ ഉറപ്പാക്കുന്നതിന്റെ ഭാഗമായി നേരത്തെ അധ്യാപകരുടെ പ്രൊഫൈലുകൾ പുതുക്കാനും, പ്രിൻസിപ്പൽമാർക്ക് അവ തിരുത്താനും, കൃത്യമായ ഒഴിവുകൾ റിപ്പോർട്ട് ചെയ്യാനും കൈറ്റിന്റെ നേതൃത്വത്തിൽ സംവിധാനം ഒരുക്കിയിരുന്നു. ഈ വിവരങ്ങളുടെ അടിസ്ഥാനത്തിലായിരിക്കും ട്രാൻസ്ഫറുകൾ നടക്കുക.

തെറ്റായ വിവരങ്ങൾ നൽകുന്ന അധ്യാപകർക്കെതിരെ നടപടിയെടുക്കുമെന്നും, അവരെ സ്ഥലം മാറ്റില്ലെന്നും സർക്കുലറിൽ വ്യക്തമാക്കുന്നു. അത്തരം തെറ്റുകൾ തിരുത്തുന്നതിനായി ഈ വരുന്ന തിങ്കൾ, ചൊവ്വ ദിവസങ്ങളിൽ (ഏപ്രിൽ 28, 29) ബന്ധപ്പെട്ട രേഖകളുമായി ഹയർ സെക്കൻഡറി ഡയറക്ടറേറ്റിൽ നേരിട്ടെത്തി തിരുത്താവുന്നതാണ്.

ഈ വർഷം പരിരക്ഷിത വിഭാഗം, മുൻഗണനാ വിഭാഗം എന്നിവയ്ക്കായി സമർപ്പിക്കുന്ന രേഖകളുടെ ആധികാരികത വിജിലൻസ് പരിശോധിക്കും എന്നത് ശ്രദ്ധേയമാണ്.

ട്രാൻസ്ഫറിനായി സംസ്ഥാനത്ത് ആകെ 7,817 ഒഴിവുകളാണ് നിലവിലുള്ളത്. ഇതിൽ ഏറ്റവും കൂടുതൽ ഒഴിവുകളുള്ളത് മലപ്പുറം ജില്ലയിലാണ് – 1124 ഒഴിവുകൾ! കണ്ണൂർ (944), കോഴിക്കോട് (747) ജില്ലകളാണ് തൊട്ടുപിന്നിൽ. ഏറ്റവും കുറവ് ഒഴിവുകളുള്ള ജില്ലകൾ പത്തനംതിട്ട (134), ഇടുക്കി (184), കോട്ടയം (232) എന്നിവയാണ്.

വിഷയങ്ങൾ അനുസരിച്ച് നോക്കുമ്പോൾ, ഏറ്റവും കൂടുതൽ ഒഴിവുകൾ ഇംഗ്ലീഷ് അധ്യാപകർക്കാണ് (859). എക്കണോമിക്സ് (527), മാത്തമാറ്റിക്സ് (482) എന്നീ വിഷയങ്ങളിലും ധാരാളം ഒഴിവുകളുണ്ട്. അതേസമയം, ജർമ്മൻ, മ്യൂസിക്, ജിയോളജി എന്നീ വിഷയങ്ങളിൽ സംസ്ഥാനാടിസ്ഥാനത്തിൽ ഒരോ ഒഴിവ് മാത്രമാണുള്ളത്. ഒഴിവുകളുടെ എണ്ണത്തിൽ മാറ്റങ്ങൾ വരാനുള്ള സാധ്യതയുമുണ്ട്. സംസ്ഥാന- ജില്ലാ തലങ്ങളിൽ വിഷയങ്ങൾ തിരിച്ചുള്ള തത്സമയ ഒഴിവുകൾ പോർട്ടലിൽ ലഭ്യമാണ്.

സ്ഥലംമാറ്റം ആഗ്രഹിക്കുന്ന അധ്യാപകർ എത്രയും പെട്ടെന്ന് പോർട്ടൽ സന്ദർശിച്ച് അപേക്ഷ സമർപ്പിക്കേണ്ടതാണ്. മലപ്പുറം ജില്ലയിൽ കൂടുതൽ ഒഴിവുകളുള്ളതിനാൽ അങ്ങോട്ടേക്ക് മാറാൻ ആഗ്രഹിക്കുന്ന അധ്യാപകർക്ക് ഇത് ഒരു സുവർണ്ണാവസരമാണ്.