വിമാനങ്ങളിലെ ബോംബ് ഭീഷണി തുടര്‍ക്കഥയാകുന്നു; ഒരാഴ്ചയ്ക്കിടെ ഭീഷണി 70 വിമാനങ്ങള്‍ക്ക്
വിമാനങ്ങള്‍ക്ക് നേരെ വീണ്ടും ബോംബ് ഭീഷണി. ആകാസയുടെ അഞ്ച് വിമാനങ്ങള്‍ക്കും ഇന്‍ഡിഗോയുടെ അഞ്ച് വിമാനങ്ങള്‍ക്കുമാണ് ബോംബ് ഭീഷണി സന്ദേശങ്ങള്‍ ലഭിച്ചത്.
ബോംബ് ഭീഷണിയെ തുടര്‍ന്ന് കേന്ദ്ര അന്വേഷണ ഏജന്‍സികള്‍ ഉള്‍പ്പെടെ സംയുക്തമായി അന്വേഷണം തുടരുന്നതിനിടെയാണ് വീണ്ടും ഭീഷണി സന്ദേശങ്ങള്‍ എത്തുന്നത്.
ഒരാഴ്ചയ്ക്കിടെ 70 വിമാനങ്ങള്‍ക്ക് നേരെയാണ് ബോംബ് ഭീഷണി ഉണ്ടായത്.
സുരക്ഷ ഭീഷണിയെ തുടര്‍ന്ന് ഡല്‍ഹിയില്‍ നിന്ന് ലണ്ടനിലേക്ക് പുറപ്പെട്ട വിസ്താര വിമാനം ജര്‍മ്മനിയിലെ ഫ്രാങ്ക്ഫര്‍ട്ടിലേക്ക് തിരിച്ചുവിട്ടു.
തുടര്‍ന്ന് ഫ്രാങ്ക്ഫര്‍ട്ട് വിമാനത്താവളത്തിലിറക്കിയ വിമാനത്തിന്റെ പരിശോധനകള്‍ പൂര്‍ത്തിയാക്കിയതായി കമ്പനി അറിയിച്ചു.
സുരക്ഷ ഏജന്‍സികള്‍ അനുമതി നല്‍കിയാല്‍ ലണ്ടനിലേക്ക് യാത്ര തിരിക്കുമെന്നും വിസ്താര അറിയിച്ചു. അതേസമയം യാത്രക്കാരുടെ സുരക്ഷയ്ക്കാണ് പ്രാധാന്യമെന്ന് ഇന്‍ഡിഗോ വിമാന കമ്പനി അധികൃതര്‍ വ്യക്തമാക്കി.
