31 ലക്ഷത്തിന്റെ കുഴൽപ്പണവുമായി രണ്ട് യുവാക്കളെ പരപ്പനങ്ങാടി പോലീസ് അറസ്റ്റ് ചെയ്തു

പരപ്പനങ്ങാടി : ചെമ്മാട് ഭാഗത്തേക്ക് കൊടുവള്ളിയിൽ നിന്നും കുഴൽപ്പണവുമായി വന്ന  രണ്ടുപേരെ പരപ്പനങ്ങാടി പോലീസ് ഇൻസ്പെക്ടർ കെ.ജെ. ജിനേഷിൻറെ നേതൃത്വത്തിൽ  പോലീസ് അറസ്റ്റ് ചെയ്തു.

കൊടുവള്ളി ഓമശ്ശേരി സ്വദേശികളായ ഉരുളൻ കുന്നുമ്മൽ ഹസൻ (25), നെല്ലിയുള്ള പൊയിൽ ഉനൈസ് (28) എന്നിവരെയാണ് മുപ്പത്തൊന്നു ലക്ഷത്തി മുപ്പത്തിനാലായിരത്തി അഞ്ഞൂറ് രൂപ സഹിതം പിടികൂടിയത്. പൾസർ മോട്ടോർ സൈക്കിളിന്റെ പെട്രോൾ ടാങ്ക് കട്ട് ചെയ്തു അതിനുള്ളിൽ പ്രത്യേകമായ അറയുണ്ടാക്കിയാണ് അതിൽ പണം ഒളിപ്പിച്ചു കടത്താൻ ശ്രമിച്ചത്.

മലപ്പുറം ജില്ലാ പോലീസ് മേധാവി സുജിത്ത് ദാസിന്റെ മേൽനോട്ടത്തിൽ പെരിന്തൽമണ്ണ, തേഞ്ഞിപ്പാലം, വളാഞ്ചേരി, മേലാറ്റൂർ, കൽപകഞ്ചേരി, മങ്കട,പരപ്പനങ്ങാടി, മലപ്പുറം എന്നീ സ്റ്റേഷനുകളിൽ സമീപ സമയങ്ങളിലായി കോടി കണക്കിന് രൂപയുടെ കുഴൽപ്പണമാണ് പിടികൂടിയത്. പിടികൂടിയ പണം പരപ്പനങ്ങാടി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് മുമ്പാകെ ഹാജരാക്കി.

തുടർനടപടികൾക്കായി എൻഫോഴ്സ്മെന്റ് ഡയറക്ടറേറ്റിനും ഇൻകംടാക്സ് ഡിപ്പാർട്ട്മെന്റിനും  അപേക്ഷ സമർപ്പിക്കുമെന്നും പരപ്പനങ്ങാടി പോലീസ് അറിയിച്ചു. എസ്.ഐ. ആർ.യു. അരുൺ, സീനിയർ സി.പി.ഒ.മാരായ അനീഷ് പീറ്റർ, സ്മിതേഷ്, സി.പി.ഒ.മാരായ രഞ്ജിത്ത്, ദിലീപ്, വിബീഷ്, മുജീബ് റഹ്മാൻ എന്നിവരും പോലീസ് സംഘത്തിലുണ്ടായിരുന്നു