കാസര്‍ഗോഡ് സദാചാര ആക്രമണം; ബേക്കല്‍ കോട്ട സന്ദര്‍ശിച്ചു മടങ്ങിയ സുഹൃത്തുക്കളെ തടഞ്ഞ് ആക്രമിച്ചു, 3 പേര്‍ അറസ്റ്റില്‍
കാസര്‍ഗോഡ് മേല്‍പ്പറമ്പില്‍ സദാചാര ആക്രമണം. ബേക്കല്‍ കോട്ട സന്ദര്‍ശിച്ചു മടങ്ങിയ പെണ്‍കുട്ടികള്‍ അടക്കമുള്ള സുഹൃത്തുക്കളെയാണ് ഒരു സംഘം തടഞ്ഞുവെച്ച് ആക്രമിച്ചത്. ഭക്ഷണം കഴിക്കുന്നതിനായി ഇവര്‍ കാര്‍ നിര്‍ത്തിയപ്പോള്‍ ചിലര്‍ ചോദ്യം ചെയ്യുകയും കശപിശ ഉണ്ടാവുകയുമായിരുന്നു.
ഞായറാഴ്ച വൈകുന്നേരത്തോടെയാണ് സംഭവം. മൂന്ന് പെണ്‍കുട്ടികള്‍ അടക്കം ആറ് പേരാണ് കാറില്‍ ഉണ്ടായിരുന്നത്. ഇവരില്‍ ഒരാളുടെ പിറന്നാള്‍ ആഘോഷത്തിന് എത്തിയതായിരുന്നു. ഇവര്‍ ഭക്ഷണം കഴിക്കാന്‍ എത്തിയപ്പോള്‍ നാട്ടുകാര്‍ ഇവരെ ചോദ്യം ചെയ്യുകയായിരുന്നു.
ഇവര്‍ പ്രതികരിച്ചതോടെ ഇരുകൂട്ടരും തമ്മില്‍ സംഘര്‍ഷമുണ്ടായി. ഇതിനിടെ യുവാക്കളില്‍ ഒരാളെ നാട്ടുകാര്‍ ആക്രമിക്കുകയായിരുന്നു. സംഭവത്തില്‍ മൂന്ന് പേരെ പൊലീസ് അറസ്റ്റ് ചെയ്തു.
