തിരൂരങ്ങാടിയില്‍ വൈദ്യുത ചാര്‍ജിങ് സ്റ്റേഷനുകളുടെ നിര്‍മാണം ജൂലൈ 31നകം പൂര്‍ത്തീകരിക്കും; മന്ത്രി കെ. കൃഷ്ണന്‍കുട്ടി
തിരൂരങ്ങാടി : തിരൂരങ്ങാടി മണ്ഡലത്തിലെ വൈദ്യുത ചാര്‍ജ്ജിംഗ് സ്റ്റേഷന്‍ നിര്‍മ്മാണം ജൂലൈ-31 നകം പൂര്‍ത്തീകരിക്കുമെന്നു വൈദ്യുത വകുപ്പ് മന്ത്രി കെ. കൃഷ്ണന്‍ കുട്ടി കേരള നിയമസഭയില്‍ അറിയിച്ചു. തിരൂരങ്ങാടി നിയോജകമണ്ഡലം എം.എല്‍.എ. കെ.പി.എ മജീദ്‌ നിയമസഭയില്‍ ഉന്നയിച്ച ചോദ്യത്തിന് മറുപടിയായാണ് മന്ത്രി ഇക്കാര്യം പറഞ്ഞത്.
മണ്ഡലത്തില്‍ എം.കെ.എച്ച്. ആശുപത്രിക്ക് സമീപം, ദാറുല്‍ ഹുദ ഇസ്ലാമിക് യൂനിവേഴ്സിറ്റിക്ക് സമീപം, വെന്നിയൂര്‍ KSEB ഓഫീസിനു സമീപം, കോഴിചെന, പയനിങ്ങല്‍ ജങ്ക്ഷന്‍, ക്ലാരി യു.പി സ്കൂള്‍ പരിസരം, കുണ്ടൂര്‍, സ്റ്റീല്‍ കോംപ്ലക്സ് പരിസരം എന്നീ എട്ടു സ്ഥലങ്ങളിലാണ് വൈദ്യുത ചാര്‍ജ്ജിംഗ് സ്റ്റേഷനുകള്‍ നിര്‍മ്മിക്കുന്നത്.
നിലവില്‍ ദേശീയപാത നിര്‍മ്മാണത്തിന്റെ സ്ഥലം ഏറ്റെടുക്കല്‍ അന്തിമാമാകാത്തതിനാലാണ് വെന്നിയൂര്‍ അടക്കമുള്ള വൈദ്യുത ചാര്‍ജ്ജിംഗ് സ്റ്റേഷനുകളുടെയും, നിര്‍ദ്ദിഷ്ട വെന്നിയൂര്‍ KSEB ഗസ്റ്റ് ഹൗസ് ന്റെയും നിര്‍മ്മാണം വൈകുന്നതെന്നും, നിര്‍ദ്ദിഷ്ട വെന്നിയൂര്‍ KSEB 110 KV സബ്‌സ്റ്റേഷന്‍ നിര്‍മ്മാണത്തിന്റെ സാങ്കേതിക പഠനം നടക്കുകയാണെന്നും, ഈ പഠന റിപ്പോര്‍ട്ട് ലഭിച്ചയുടന്‍ തുടര്‍ നടപടികള്‍ സ്വീകരിക്കുമെന്നും എം.എല്‍.എ യുടെ ചോദ്യത്തിന് മറുപടിയായി മന്ത്രി പറഞ്ഞു.
