കോഴിക്കോട് പെട്രോള്‍ പമ്പില്‍ വന്‍ കവര്‍ച്ച; ജീവനക്കാരനെ കെട്ടിയിട്ട് മര്‍ദ്ദിച്ചു
കോഴിക്കോട് പെട്രോള്‍ പമ്പില്‍ ജീവനക്കാരനെ കെട്ടിയിട്ട് വന്‍ കവര്‍ച്ച. കോട്ടൂളിയിലെ പെട്രോള്‍ പമ്പിലാണ് സംഭവം. 50,000 രൂപ കവര്‍ന്നു എന്നാണ് പ്രാഥമിക നിഗമനം. ഇന്നലെ അര്‍ധരാത്രിയാണ് കവര്‍ച്ച നടന്നത്. പമ്പിലെ ജീവനക്കാരനെ കെട്ടിയിട്ട് മര്‍ദ്ദിച്ച് അവശനാക്കിയ ശേഷമാണ് പണം കവര്‍ന്നത്.
മുഹമ്മദ് റാഫിക്കാണ് പരിക്കേറ്റത്. ഇയാളെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്. സംഭവത്തില്‍ പൊലീസ് കേസെടുത്ത് അന്വേഷണം ആരംഭിച്ചു. എത്ര പേരാണ് കൃത്യത്തില്‍ പങ്കെടുത്തതെന്ന് വിവരം ലഭിച്ചിട്ടില്ല. മെഡിക്കല്‍ കോളജ് പൊലീസും ഫോറന്‍സിക് വിദഗ്ധരും സംഭവ സ്ഥലത്ത് പരിശോധന നടത്തുകയാണ്.
ആക്രമണത്തിന്റെ സിസിടിവി ദൃശ്യങ്ങള്‍ പൊലീസിന് ലഭിച്ചിട്ടുണ്ട്. കറുത്ത മുഖം മൂടിയണിഞ്ഞാണ് ആക്രമി പെട്രോള്‍ പമ്പിലെത്തിയത്. കറുത്ത വസ്ത്രങ്ങളും കൈയുറയും ധരിച്ച ഇയാള്‍ പെട്രോള്‍ പമ്പിലെ ഓഫീസിലേക്ക് ഇടിച്ചു കയറുകയായിരുന്നു. തുടര്‍ന്ന് പമ്പിലെ ജീവനക്കാരനും ഇയാളും തമ്മില്‍ ഏറ്റുമുട്ടലുണ്ടായി. ജീവനക്കാരനെ ഇയാള്‍ ക്രൂരമായി മര്‍ദ്ദിക്കുന്നത് ദൃശ്യത്തില്‍ വ്യക്തമാണ്
പിന്നീട് തുണി ഉപയോഗിച്ച് ജീവനക്കാരന്റെ കൈകള്‍ രണ്ടും കൂട്ടിക്കെട്ടിയ ശേഷം ആക്രമി ഓഫീസാകെ പരിശോധിച്ചു. ശേഷം ഇയാള്‍ പമ്പില്‍ സൂക്ഷിച്ചിരുന്ന പണവും കൊണ്ട് രക്ഷപ്പെടുകയായിരുന്നു.
